[Llugones 0-0 Ciares] El Ciares suma y sigue
Yeren tantes les ganes d’esti partíu, que los equipos nun pudieron esperar a la hora p’arrincar. Faltaben inda cinco minuto pa la hora programada, cuando l’árbitru señalaba l’empiezu del alcuentru.
Sosprendía Nacho Cabo cola alliniación, Pablo sustituyía a Kike na portería y Fran Do Santos debutaba como titular, xugando pegáu a banda derecha. Y apenes empezaba’l partíu, nuevu cambéu tácticu. Juan Carlos salía mancáu, entrando Pelayo Torre nel so llugar.
Cola sustitución, un imperial Jimmy baxaba a centru de campu, Borja Argüelles y Ponte turnábense na media punta y punta, y Fran y Pelayo ocupaben les bandes.
La primer parte tuvo claru color visitante, que dexó con vida a un Llugones qu’a pesar de tener más el balón, sufría ante los contrataques ciaristas.
Llugones 0 – 0 Ciares
Llugones: Segura, Zapico, Miguel, Tapia, Castillo, Luis, Imaz, Rodri, Prieto (Ardura 66′), Plaza y Juan Sánchez
Ciares: Pablo Díez, Fonso, Lozano, Borja Noval, Ósar Ruiz, Juan Carlos (Pelayo Torre 15′), Pablo Martínez, Fran Dos Santos (Rigo 82′), Jimmy, Borja Argüelles y Ponte (Rubo 67′)
Árbitru: González González. Amonestó pol Llugones a Zapico y Prieto. Pol Ciares mostró tarxeta amariella a Pelayo Torre y a Ponte.
Incidencies: Partíu correspondiente a la vigésimo cuarta xornada de Tercera División apostau nel campu Santa Bárbara ante unos cuatrocientos espectadores, un centenar del Ciares. Antes del partíu guardose un minutu de silencio pol fallecimientu de Luis Aragonés.
Los brickers tuviéronles de toos los collores nestos primeros cuarenta y cinco minutos. A puntu tuvo Óscar Ruiz de consiguir un gol olímpicu. Frivolidá de Ponte dientro de la área rematando de tacón anque-y sale bien centráu’l remate. Unu contra unu de Jimmy que dribla a Segura, dribla a otru defensa, pero’l balón váse-y bien llargu.
Sicasí, la ocasión más clara teníala Fran. Salida rápida a la contra de Borja Argüelles forzando un trés pa unu. Balón pa Jimmy, Jimmy pa Fran, pero Segura estena l’unu contra unu .
Entá hubo tiempu pal discutiniu. Valtamientu de Segura a Borja Argüelles dientro de la área local que nin árbitru nin asistente consideren punible. Yera’l minutu 43, y na contra a puntu tuvo’l Llugones de bater a Pablo.
La segunda parte empezaba como acababa la primera. Gran xugada de Jimmy, penera’l pase pa Borja Argüelles, pero l’arteru estremu teyero nun sabe definir ante la salida de Segura y dispara enriba. Y ende empezó a xugar el Llugones.
Esi segundu periodu foi local, apoderó’l xuegu y creó más apeligro’l Llugones que los brickers. Hasta dos manos a manos tuvieron los xugadores sierenses p’adelantrase. Pero una vegada Pablo, y otra la falta de puntería, dexaron el marcador local a cero.
Final frenético. Gran xugada d’Óscar Ruiz, balón pa Pelayo Torre, Borja Argüelles busca de nuevu a Pelayo pero nun llega cuando namás tenía qu’emburriala. Yera’l minutu ochenta y ocho pero paecía que’l partíu acababa ende.
Pero nin tanto, cuando se cumplía’l tiempu gran xugada dende l’estremu derechu de Juan Sánchez, centru de la muerte, y Lozano estenaba escontra la so propia puerta pero’l so refugue diba llambiéndose el llargueru. Los pulsómetros taben a tope.
A la fin, empate bonu pal Ceares, pero con sensación de que los trés puntos podríen habese veníu a la Teyerona. El próximu sábadu espéranos la Llealtá, anque partidazu ente dos equipos que nun se posaron de los puestos altos de la tabla. Un partíu de 6 puntos.