Triunfu mereciu escontra’l Llugones (3-1)

El miércoles pasáu, a namás que diez díes pa qu’empiece la Lliga, recibíamos al Atlético de Lugones, conxuntu de la nuesa mesma categoría, nel postreru partíu de pretemporada en La Cruz (aínda queden dos fora de casa).

La nuesa alliniación foi la siguiente: Kike, Martín, Lozano, Rigo, Óscar Ruiz, Pichón, Meana, Borja Argüelles, Pelayo Torre, Jimmy y Rubo.

Nun entamamos bien y pasáu’l primer cuartu d’hora, un xugador rival escapábase peligrosamente escontra la nuesa portería cuando Óscar Ruiz entró-y en segada y l’árbitru concedió falta magar les protestes del fondu folixeru ciarista. La falta, na frontera de la área, foi tresformada con calidá percima de la barrera ensin que Kike pudiera facer nada. A la media hora de xuegu Fonsi sustituyía a Meana nel centru del campu. Por esi entós, yá se taba cuayando’l dominiu ciarista, anque’l marcador reflexaba la efectividá visitante.

Na segunda parte vinieron los nuesos meyores minutos. El dominiu de la posesión empezó a facer esmornia nel Atlético de Lugones, y tres una formosa xugada colectiva, Rubo recibía, perfilábase, y asitiaba el balón nel palu llargu pa empatar el partíu. A partir d’ende amontóse’l dominiu local. Pasada la hora de xuegu Nacho Cabo ordenaba un triple cambéu: Galache, Juan Carlos y Meana sustituyíen a Pelayo Torre, Rubo y Martín. Poco dempués llegaría’l 2-1. Borja Argüelles cueye’l balón nel estremu derechu del nuesu ataque, regatia a dos rivales ente los aplausos del públicu, y da el pase de la muerte pa que Jimmy l’emburrie a la rede. A 20 minutos pal final Pablo sustituyía a Kike baxu palos. Cuando’l partíu yá llegaba al so fin, nel minutu 90, Pichón, exerciendo de punta, recibía’l balón tres un gran desmarque al llombu de la defensa y definía con clase asitiando’l balón a un llau del porteru.

Final del partíu, 3-1, y l’afición satisfecha tantu pola resultancia como pol xuegu, esperando que llegue’l día 1 de Setiembre pa poder volver ver fútbol en La Cruz. Hasta entós va tocar viaxar pa siguir al equipu:

– Sábadu 17 en Roces, Triangular Giovanni ante TSK Roces y Real Avilés ‘B’.
– Miércoles 21 en Los Pericones, CD Manuel Rubio – UC Ceares.
– Y a lo último la fin de selmana de’l 24 y 25 vamos empezar la Lliga, en Posada de Llanes, visitando al Urraca CF.