Skip to main content

[Mosconia 1-2 Ciares] Brillante primer parte

Mosconia - Ceares 2016

El Ciares trae los puntos de Grau sofitaos por una primer metá brillante y con un ciertu grau de suspense na segunda parte.

Mosconia - Ciares 2016
En cada parte, solo hebo un conxuntu en prau.

Servía’l festivudel del primeru de payares pa xugar l’alcuentru correspondiente a la xornada pente selmana, anque la mayoría de los partíos va disputase mañana. Tocaba pa’l Ciares visitar al Marqués de la Vega d’Anzo, casa d’un Mosconia en problemes clasificatorios.

Mosconia 1 – 2 Ciares

Mosconia: Álvaro, Pelayo, Adrián, Secades, Diego (Valdés 46′), Josín, Rubén, Aitor (Vázquez 30′), Cali, Jony, Isra (Blin 50′).

Ciares: Nacho, Iván (Miguel 70′), Fonso, Beni, Chery, Hugo, Juan Carlos, Pablo Martínez, Natan, Cayarga, Marcos (Javi 80′)

Goles:
0-1: Juan Carlos 24′
0-2: Marcos Iglesias 25′
1-2: Rubén 65′

Árbitru: López Abelleira, del Colexu d’Uviéu. Amonestó a Josín y Secades pol Mosconia, y a Beni y Marcos pol Ceares.

Incidencies: Partíu correspondiente a la duodécima xornada del Grupu 2 de Tercera División. 250 espectadores, con presencia destacada de siguidores del equipu visitante. Terrenu de xuegu en buenes condiciones.

Recuperaba Tino a los sancionaos Beni y Marcos, y los dos yeren de la partía. Beni, como central zurdu, y Marcos como delanteru centru. Ambos sustituyíen a Miguel y a Javi Gutiérrez, que veríen l’entamu dende’l banquín.

Nun asemeya esta primer parte a lo vistu frente al Tinéu. Munches llegaes del Cuares, con munches ocasiones de gol y posibilidá de tener sentenciáu’l partíu. Mui participativos Juan Carlos y Pablo Martínez, que buscaben pela banda a Natan y Cayarga. Amás, Marcos baxaba bien el balón d’espaldes y lu xugaba con criteriu

La primer ocasión teníala Hugo, que se desmarcaba bien al primer palu nun córner servíu por Pablo Martínez, pero´l so remate peinando’l balón machaba alto per poco.

El partíu quedaba, paecía, sentenciáu en malpenes dos minutos. Primero col tantu de Juan Carlos. Gran xugada pela banda derecha del Ciares, que terminaba con centru medíu de Marcos y gran remate de cabeza a la escuadra del capitán teyeru.

Dos minutos dempués metía Iván Suárez un balón a la espalda de la defensa dirixíu a Marcos. Esti plántase frente al porteru mui escoráu a la derecha pero lu bate con muncha clase perriba, picando´l balón.

Con 0-2, saltaba al verde un vieyu conocíu de l’afición visitante, Jorge Vázquez, dando movilidá al ataque moscón.

Pero nun se contentaben los de Tino, que seguíen llevando’l peso del alcuentru y creando peligru. Por exemplu Cayarga, que recibía un pase pelo alto de Pablo Martínez, driblaba al porteru llocal con un toque cola cabeza, pero´l disparu salvábalu la defensa baxo palos.

Nel llanzamientu d’esquina consecuencia d’esta xugada, yera Beni’l que remataba, salvando col porteru con una gran parada a la base del so palu derechu.

La segunda parte entamaba como la primera. De fechu, Marcos Iglesias pudo sentenciar a los 7 minutos, cuando encaraba con un balón de Cayarga al porteru, esta vegada pel costáu zurdu. Díbase del defensa, pero´l disparu al palu curtiu refugábalu’l porteru.

Dempués foi Pablo Martínez, nun disparu duru dende’l balcón del área, que s’envenenaba al pegar nun defensa, pero’l porteru reaccionaba bien y salvaba. Y Beni, que de nuevu remataba un córner, pero marchaba’l balón llambiendo’l poste.

Sicasí, la última media hora de partíu foi llocal. Pasu delantre de los moscones y atrás de los teyeros. Comentábase nla grada qu’un gol llocal los metía nel partíu y asina foi. Gran xugada de Jorge Vázquez pela banda izquierda, con pase atrás pa que Rubén, capitán llocal, marque a placer.

Siguieron intentándolo los llocales, pero con balones altos, qu’a la postre ye munchu ruiu y poques nueces. Más sensación que peligru real.

Tino fizo por pesllar la banda derecha dando entrada a Miguel por Iván, desplazando a Fonso al so puestu avezáu. Con esi cambeu zarróse la llista d’oportunidaes de gol llocales. L’otru cambeu foi un Marcos, amonestáu, por Javi.

Al final, victoria con sufrimiento pero xusta, sofitada nuna primer parte brillante. El domingu llega a la Cruz un de los cocos, l’UP de Llangréu, que vien de goliar en derbi al Tiuya. Alcuentru, de xuru, con ambiente de grande.

0
    0
    Carrito
    Tu carrito está vacíoVolver a la tienda