Nenguna baxa nel fútbol base
Nun club humilde como’l nuesu, les grandes noticies nun suelen ser títulos o ascensos, si non coses más simbóliques como qu’el nuesu presidente dea’l pregón nes fiestes del barriu, que los vecinos reconozan el nuesu llabor social, o la noticia que güei nos ocupa: que tolos neños del nuesu fútbol base vaigan siguir otra temporada nel club.
L’añu pasáu un grupu de padres y madres decidió confiar la educación deportiva de los sos fíos al Unión Club Ceares y a los sos entrenadores. Yera’l primer añu que sacábamos equipos de neños, polo que la incertidume de primeres foi grande: tou taba por facer, había que buscar entrenadores, colexos, material deportivu… pero aun así confiaron en nós. Y paez que nun-yos decepcionamos; ente toos consiguimos superar tolos problemes que fueron surdiendo, y esta temporada toes eses families decidieron siguir con nós.
Hai que destacar que munchos de los nuesos neños fixeron grandes temporaes, y qu’equipos importante llamáronlos pa xugar en categoríes cimeres, pero tantu ellos como les sos families decidieron que la Unión Club Ceares siguiera siendo la so casa. Los nuesos dos equipos de profútbol, el de prebenjamines y los dos redrueyos, toos acabaron en metá de la tabla, pero lo que destacó foi’l bon ambiente esistente y los grupos que se formaron. Inclusive ye habitual ver a dellos d’ellos en La Cruz esfrutando de los partíos de Tercer División. Anguaño la familia sigue creciendo, y vamos tener un benjamín y un prebenjamín más, amás de dar el saltu a campu con un alevín y un xuvenil.
Munches vegaes los agradecimientos ponense por cumplir y por cortesía, pero nel nuesu casu son de corazón, porque ensin tanto trabayu desinteresáu nada nesti club sería posible. Munches gracies a Iván, Iñigo, Aymará, Rocío, Víctor, César, Carlos, Óscar, Juancho… pol so esfuerzu y dedicación colos pequeños, y a Fernando y Pulido por echar un gabitu coles entraes o lo que fixera falta. Tamién a El Café de Lola y a la Boca en Boca, patrocinadores de los equipos, y al Colexu Campoamor pol so enfotu dende l’empiezu. Finalmente, mención especial pa Borja, impulsor y responsable del fútbol base, siempres pindiu del más mínimu detalle en cualesquier de los equipos.
Estimámosvos l’enfotu y esperamos esfrutar d’otru gran añu toos xuntos, demostrando lo cierto que ye eso de “postreros en dineru, primeros en corazón”.
¡Puxa Ciares!