[Pravianu 1-1 Ciares] Pim, pam, pum y la musica en Pravia
A falta solamente de tres xornades, dábense cita en Santa Catalina dos equipos de los que creen afición. Dos equipos qu’iguaron el so presupuestu pa nun pasar aforfugos, pero tán enriba. Col puntu de güei, el Pravianu certifica la so participación nel play-off. El Ciares, podría certificala’l domingu.
La paecencia ente dambos equipos nun se reflexa nel xuegu. El Pravianu, de la mano de Xiel, ye un equipu bien físicu. Primen enforma y salen rápido, llevando enforma peligru dende los estremos. Per otru llau, el Ciares busca combinar y tocar el balón. Xugando a dos toques si puede.
Pravianu 1 – 1 Ciares
Pravianu: Raúl, Areces, Moisés, Pablo Busto, Bertín, Fran Martín, Luis, Dani Girol, Morán (Manu 85′), Aitor y Guille Méndez
Ciares: Pablo, Fonso Bellón, Lozano, Aitor Cañedo, Borja Noval, Juan Carlos, Meana, Borja Argüelles (Rubo 86′), Jimmy, Pelayo Torre y Ponte (Rigo 94′)
Goles:
0-1: Borja Argüelles 40′
1-1: Guille Méndez 69′
Árbitru: García Martínez (Nalón). Amonestó pol Pravianu a Areces, Fran Martín y Bertín. Pol Ciares expulsó por doble mariella a Aitor Cañedo y amonestó a Borja Noval, Jimmy, Fonso y Juan Carlos.
Incidencies: Alcuentru correspondiente a la xornada trigésimo sesta de Tercera División disputau en Santa Catalina ante unos cuatrocientos espectadores, un centenar d’ellos del Ciares . Terren de xuegu en perfectes condiciones.
Importantes baxes presentaben güei los teyeros na medular. Dos de los habituales mediocampistes yeren baxa, Pichón por un frayatu de fibres, y Pablo Martínez por acumuladura de amonestaciones. La solución, la esperada. Juan Carlos y Meana formaben como pareya de mediocentros, y Ponte saldría de punta de llanza. Les otres dos novedaes yeren la d’Aitor Cañedo, qu’empezaba como llateral esquierdu, y la Pablo Diez, porteru.
L’ausencia d’ocasiones de gol foi una constante mientres el partíu. Empezaba fuerte’l Pravianu, intentando facese dueñu del balón. El partíu xugábase nel campu del Ciares. Paecía que’l partíu diba facese llargu pa los brickers.
Namás duró quince minutos. A partir d’ende empezaron los de Cabo a venise enriba. Circulación de balón, y el Pravianu más metíu tras. La mediapunta local asustó, pero remató alto un centru dende banda. Foi un espeyismu.
Minutu cuarenta. Borja Argüelles regatia a tou xugador local qu’osa entra-y. Tría’l balón tirando un cañu, y marca por baxu col esterior del pie. Mesma definición qu’en Ganzábal, gol igual d’importante.
Disparábense les cábales ente los aficionaos teyeros al descansu. Salía tou bien, namás faltaba la resultancia del Cuadonga. La entruga que más se facía yera si un empate col Llenizu’l próximu domingu sería bastante.
Yá na primer xugada de la segunda parte, Borja Argüelles recibía una falta na frontera de la área local. Paecía que’l partíu siguiría igual.
Pero de nuevu l’árbitru decidió ser protagonista. Si risible paecía la primer tarxeta a Aitor Cañedo, la segunda raspiaba l’absurdu. El llateral visitante abría’l brazu pa protexese, y el colexáu, yá bien protestáu nel postreru partíu arbitráu al Ciares, decidía amosa-y la segunda mariella. Increíble.
Asediu a partir d’ende del Pravianu. Córners, faltes, llegaes. El Pravianu precisaba’l puntu. Rigo sustituyía a Ponte, Borja Noval movíase al llateral esquierdu. Pero nun yera abondu, el Pravianu nun cesaba.
Veinte minuto aguantó’l Ciares. Llegando al minutu setenta, Guille Méndez engabitaba un balón na frontera y llograba un golazu. Empate, y otros 20 minutos per delantre.
A partir d’ende, un estelar Pelayo Torre buscaba les contras, acompañáu por Jimmy y Borja Argüelles. Pero’l Pravianu decidió nun arriesgar, el puntu metíalu en play-off.
Puntu importante pa dambos equipos. El próximu domingu na Cruz podría vivise una auténtica fiesta. Que nun falte naide.