Primer puntu de la temporada

Por fin llegaba’l momentu que tanto tiempu llevábamos esperando. Posada de Llanes yera la primer parada nesti viaxe de 38 xornaes, y ellí fuimos xugadores, técnicos, y qué tanto, aficionaos.

Les baxes en defensa de Borja Noval, Fonso Bellón y Aitor, fueron arreglaes por Nacho Cabo tirando a Rigo al llateral y asitiando a Juan Carlos a la exa de la zaga. El partíu entamó bien apostáu, con unos minutos de tantéu animaos poles cantaraes de la grada ciarista. A partir del minutu 15 la balanza inclinóse del llau llaniscu, y antes de la media hora Kike alzóse protagonista al salvar una volea dende dientro de la área que blocó seguro, y un remate a espetaperru qu’estenó amosando unos reflexos espectaculares. Nos minutos finales d’esti primer periodu respondimos con dos oportunidaes, una d’elles perclara: gran xugada de Borja Argüelles entrando pol estremu derechu, y el so centru bombiáu yera rematáu de cabeza por Pelayo Torre en situación inmeyorable, pero cuando lliteralmente yá se cantaba’l gol, Ricardo estenó sobre la llínea de gol. Bordiando’l descansu Jimmy tuvo la suya, pero la so volea dende la frontera salió cerca del palu.

La segunda parte entamó con Pelayo Torre y Jimmy como protagonistes, y ye qu’al poco de sacar de centru, un disparu de Pelayo dende fora de la área foi rechazau por Ricardo, y Jimmy, bien asitiáu, nun llegó al refugue por bien pocu. Nel minutu 60, na so primer llegada de la segunda parte, l’Urraca llograba’l gol: córner dende la banda derecha, cabezazu del  Urraca, y tres un refugue, el defensa Suero emburriaba’l balón a les redes defendíes por Kike. Tres el gol Nacho Cabo movió pieza: Pablo Martínez entraba por Meana. El cambéu nun foi un xugador por xugador’ como podría paecer; Pablo Martínez asitiose en banda derecha, polo que Borja Argüelles se retrasaba hasta llateral, Rigo acompañaba a Lozano como central, y Juan Carlos adelantraba la so posición al mediocampu al pie de Pichón. Una nueva combinación ente Pelayo Torre y Jimmy volvió merecer el gol; recibe Jimmy dientro de la área que caricoliando, cede-y intelixentemente a Pelayo, pero’l so remate dende la frontera vase alto. Poco dempués foi Rubo quien s’escapaba en velocidá, y en llantándose na media lluna de la área, el so disparu díbase esviáu por centímetros. Nel minutu 75, en plena ofensiva, Ponte saltaba al verde por Rubo, asitiándose como referencia enriba. Cinco minuto dempués, l’ábanu ciarista tendría premiu: nueva internada pela banda esquierda d’Óscar Ruiz, y el so disparu sospriende a Ricardo en tocando llixeramente nun defensa. A partir d’ende la tensión foi máxima, con protestes variaes ya inclusive una tangana. L’Urraca apertó con fuerza, y a puntu de cumplise’l tiempu reglamentariu Kike volvió salvar un disparu peligrosu. Final del partíu y repartida de puntos tres un alcuentru llenu d’alternatives, con muncha tensión y presión, que dexó claro lo igualao y esixente que va ser esta Tercer División.

El Sábadu a les 18:00, primer partíu de la temporada en casa: U.C. Ceares – R. Uviéu ‘B’. La grada tien de marcar el primer gol, ¡Vemosnos en La Cruz!