Referendum pol nome: informaciones finales
Vamos dar les informaciones finales pal referéndum del nome del club.
Horarios
Les mesa, que va tar nel Campu La Cruz, va abrir a les 17:00 hores, una hora antes del partíu, y va cerrar a les 21:00, una hora tres la so finalización.
Condiciones de votu
- Pa votar hai que tener un mínimu de 16 años, como establecen los estatutos del club nos procesos eleutorales.
- Voten les persones, non los carnés. Esto quier dicir que sacante nel casu del votu per corréu, pa votar hai que personase nel alcuentru, y va riquise la acreditación de la identidá per mediu del D.N.I. Nun se dexa la delegación de votos.
- Pa poder votar, tien de tase al corriente de les cuotes de sociu. Nun va haber tratos de favor pa evitar agravios comparativos, munchos socios completaronles adulces y con esfuerzu por cuenta lo malo la economía.
Desenvolvimientu de la votación
La mesa electoral va tar asitiada, si dexa’l tiempu, a la entrada’l campu, de forma bien visible. Va Haber dos urnes, una pa los socios del 1 al 150, y otra pa los socios del 150 p’arriba.
De la supervisión del votu en caúna d’elles va encargase un miembru de la comisión eleutoral escoyida na última asamblea, asistíos pol secretariu del club en casu que se produzan duldes o problemes.
Escrutiniu
Al zarru de les urnes, los miembros de la comisión electoral, van proceder al recuentu de los votos. El recuentu va ser públicu, colo que cualquier sociu que quiera tar presente puede facelo, la única llimitación va ser la del propiu espaciu físicu.
Animamos a tolos socios a participar, votando por una de les opciones o votando en blancu, por que la participación sía alta y por tantu’l resultancia vease lexitimada pola mayoría de la masa social.