Resume de la Asamblea Ordinaria de Soci@s
El Xueves pasaes les 20:00 y col local de l’Asociación de Vecinos a españar, empezaba l’asamblea xeneral del U.C. Ceares. Un total de 69 socios atopamosnos ellí pa esponer los nuesos distintos puntos de vista y siguir construyendo’l club ente toos.
El primer puntu del día foi’l informe económicu. El nuesu tesoreru David tomó la pallabra pa resumir un añu bien positivu que se cerró con un beneficiu de 11.000€, gracies en gran midida al playoff. En cuanto al presupuestu de la próxima campaña, va aumentar precisamente por cuenta de esos beneficios que se reinvierten nel club, anque tamién pola previsión de crecedera social. Tantu les cuentes de la temporada 2013/2014 como’l presupuestu pa la 2014/2015 fueron aprobaos por unanimidá. Finalmente nel apartáu económicu xurdió la cuestión del chigre. La directiva selmanes antes plantegara dos alternatives por que se fueren aldericando: concesión a una persona o xestión per parte del propiu club. La opción 1 ufiertaba una evolución de la situación actual con cambeos como’l pagu del arrendáu al club d’una cantidá fixa cada mes; la opción 2 ufiertaba una xestión non remunerada de la que s’encargaríen un grupu de directivos y socios. Tres delles intervenciones de socios dando les sos opiniones tantu nun sentíu como n’otru, llególa votación, siendo escoyida por mayoría la opción 2, la xestión del chigre per parte del club.
Como segundu puntu del día pasamos al informe deportivu. Nesti puntu la dirección deportiva encabezada por Roberto Colunga fizo una repasada a la esitosa temporada, playoff incluyíu, pa dempués pasar a dar delles esplicaciones sobre la situación actual. Como yá tescendiera nos medios, esplicáronse les diverxencies con Nacho Cabo tocantes al proyectu deportivu y fueron contestaes les distintes entrugues plantegaes polos socios sobre fichaxes, mires, baxes y demás. Tres el primer equipu tamién se fizo un resume de la temporada nel fútbol base, esplicando’l papel de cada equipu, la política llevada a cabu y tamién rindiendo cuentes de cómo foi invertíu’l dineru ingresáu al traviés de los nuesos guah.es, siempres repercutiendo nellos. Propunxéronse una serie de abonos de fútbol base por categoría (prebenxamín, benxamín, alevín…) que dan derechu a asistir gratuitamente a esos partíos en cuenta de pagar entrada, apurriendo comodidá y un llixeru aforru, siendo aprobáu por unanimidá.
El tercer puntu del día foi’l informe social. El nuesu secretariu Xosé informó sobre cuestiones xenerales en redol a la masa social y a la crecedera progresiva que vivimos. Propúnxose caltener los precios de les cuotes de socios, siendo aprobada por unanimidá. Quedó aparcada l’aprobación d’un carné de simpatizante, pindios d’atopar fórmules interesantes enfocaes al aficionáu, principalmente de fora d’Asturies, qu’apenes puede allegar a La Cruz pero quier collaborar. Tamién propúnxose una rebaxa de la entrada xeneral a 10€, aprobada unánimemente. Finalmente propúnxose la realización de cuatro asamblees xenerales al añu, una por trimestre, pa facilitar la participación de los socios. Asina mesmu propúnxose un alcuentru informativu mensual con una fecha fixa (mentóse l’últimu Vienres de cada mes pero ta por decidir) na que la directiva va informar a los socios y estos van poder facer suxerencies y entrugues, anque les votaciones van tener llugar nes asamblees xenerales cada trés meses. Foi aprobáu por unanimidá.
Pa cerrar l’asamblea pasamos al apartáu de ruegos y entrugues. Ente les diverses intervenciones destacaron dos. Un sociu del club solicitó abrir alderique sobre la cuestión de les primes económiques a los xugadores, asitiándose en contra d’elles y amenando intervenciones a favor y en contra. Pa terminar, otru sociu propunxo la posibilidá de camudar el nome del club asturianizándolu de Ceares a Ciares, xenerando tamién distintes respuestes. Dambes cuestiones quedaron rexistraes y van empezar a aldericase siendo puntu del día na próxima asamblea. Siguiendo colo decidío na asamblea, el mes que vien va tener llugar la primer xunta informativa, y dientro de tres meses va ser la próxima asamblea xeneral del sociu, siendo dambes anunciaes cola antelación correspondiente.