[Tapia 0-1 Ciares] Raspiando la gloria

Victoria pola mínima, pero con gran xuegu, del Ciares frente al Tapia. Los teyeros tán a 6 puntos de llograr matemáticamente el play-off d’ascensu.

Hasta cuatro baxes d’habituales titulares presentaba l’Unión Club Ceares na so visita a Tapia. A les yá anunciaes de Lozano y Juan Carlos por acumuladura de tarxetes, sumábase la de Borja Noval que nun entraba tampoco na convocatoria y la de Jimmy, apenes ensin entrenamientu esta selmana que salía na segunda parte en sustitución d’Álvaro Ponte.

Pero la fondura de plantiya del Ciares esta campaña ye digna d’allabancia. Un sobresaliente Aitor Cañedo suplía a Lozano nel centru de la zaga, Meana y Pablo Martínez llevaben la batuta y Pichón salía ente llínees.

Salía en tromba’l Ciares y atropaba ocasiones darréu. Auténticu monólogu’l protagonizáu polos brickers nel primer tiempu. A pesar del mala traza del terrén de xuegu, con muncho sable y bien alto, los de Nacho Cabo llograben combinar.
Cuatro córners llanzaben yá nos primeros quince minutos, los dos primeros quedábense curtios. El terceru y el cuartu llanzabenlos abiertos y en dambos conectaba Aitor Cañedo al remate. El primeru salvabalu el porteru local con apuros, el segundu díbase-y alto.

Ponte, Pichón, Borja Argüelles, Pelayo Torre, Pablo Martínez atropaben ocasiones y disparos que nun terminaben en gol, per una parte debíu al bon porteru local, en parte pola falta de puntería.

Na segunda nun camudaba’l panorama. Apenes diera empiezu, Rigo empalaba con pierna esquierda un balón qu’había quedáu refugáu na área, pero Piñera refugaba colos pies.

Siguíen pasando los minutos. El Tapia, que no disparó nos noventa minutos, sacaba’l primera córner raspiando la hora de partíu. Na contra quedábase Pichón namás contra’l porteru, picaba’l balón pero estrellábase nel llateral de la rede.

Cuando más agónicu facíase tou, cuando más apertaba la grada visitante, el llateral esquierdu del Tapia cortaba un balón cola mano y vía la so segunda tarxeta. Quedaben diez minutos.

Falta na frontera, perfilada pa un zurdu. Pablo Martínez asitiábala. Y Pablo Martínez clavábala.

D’ende a la fin, balón pal Ceares, posesiones infinites. Y españíu d’allegría cuando l’árbitru señalaba’l final del partíu.
Namás queden doce puntos en xuegu, y el Ciares supera en siete al so principal persiguidor na tabla, el Cuideiru, al que reciben el xueves en La Cruz nun partíu con mayúscules.

Si les matemátiques nun fallen, una hipotética victoria del Ceares xunida a un empate o derrota del Cuadonga y Tiuya, meteríen a los teyeros nel play-off d’ascensu a Segunda División B. Pura hestoria con mayúscules.