[Tinéu 0-0 Ciares] Atragantose-yos La Espina

El Ciares sólu suma un puntu ente’l Tinéu, nun partío feu y trabáu nel que los teyeros nun tuvieron ocasiones clares hasta los últimos venti minutos.

[youtube]https://youtu.be/em1PcLijKoE[/youtube]

Tocaba viaxar a Tinéu. Un recién ascendíu, que caltenía’l bloque de la pasada temporada. Quizás el viaxe más llargu de la temporada, y puede que tamién el más esóticu, pues munchos socios teyeros nun conocíen el Municipal de San Roque, coquetu campu del equipu llocal.

Los dos equipos llegaben nun momentu delicáu. El Ciares llevaba un severu varapalu tres caer la pasada xornada en La Cruz frente al Pravianu, dempués de bordar el fútbol en Colunga. El Tinéu pela so parte comenzara fuerte la temporada, pero 5 derrotes siguíes metiéronlos na zona de pánicu.

Pal Ciares non demasiaes novedaes. La principal, la vuelta de Juan Carlos. El pivote entraba na convocatoria por primera vez esta temporada, y lo facía además disputando los 90 minutos. Acompañaba a César nel mediucampu, lo que tiraba a Aitor al llateral, y a Chery al estremu. Cris esperaba la so oportunidá dende’l banquín.

Demientres los primeros 45 minutos fútbol pocu, ocasiones nenguna. Los llocales optaron por desactivar el xuegu teyeru. El xuegu nun fluyía, a pesar del doble pivote “xugón”. Munches faltes, interrupciones. A penas nun se conseguía continuidá nel xuegu.

Tardó’l Ciares en crear la primera opción. Llego tres d’una xugada de César, que cede pa Pablo Martínez nel vértice izquierdu del área. El so disparu tres dribling marchaba mui desviáu.

El partíu terminó d’empuercase pasada la media hora. Marcos Iglesias pugna por un balón pero recibe un coldazu na boca. L’ariete xixonés ve la tarxeta dempués de revolvese y buscar al so agresor, malpenes pudieron contenelu. Temíase la segunda tarxeta, yá que los centrales llocales diben al suelu con facilidá en toles disputes qu’entablaben con Marcos de pol mediu.

Quiso calmar Iñaki Eraña los ánimos amagando con sacar a Rubo, pero finalmente nun s’efectuó’l cambiu. De fechu, Marcos tuvo la más clara tres d’una gran arrancada, que terminaba con disparu buscando’l primer palu. El balón terminaba en córner.

Al descansu, sí s’efectuaba’l cambiu. Saltaba Rubo pol amonestáu Marcos Iglesias. Tarxeta que, por ciertu, va impedi-y disputar l’interesante duelu frente al Llangréu del prósimu domingu al tratase de la quinta.

La segunda parte llevaba’l mesmu camín que la primera. El Tinéu conformábase col empate, perdía’l tiempu, paraba’l partíu, empuercaba’l xuegu. Y el Ciares desesperábase y nun veía manera de superar a los llocales.

Pero too cambiaba a partir del minutu 70. Pasu alantre del Ciares, qu’empezó a xugar y a demostrar que quería ganar el partíu. Tuvo Rubo la primera y más clara. Gran apertura de César buscando a Natan. Recorta y la pon cola izquierda, pero a Rubo vase-y el remate raspiando’l poste cuando ya se cantaba’l gol.

A renglón siguíu, buen testarazu de Beni al segundu palu. Cabeciaba picando’l balón abaxu, pero’l so remate perdíase a escasos centímetros del poste derechu.

La última clara tendríala de nuevu Rubo. Alcuéntrase col balón dientro del área en buena posición, pero pega-y mordíu y rebota nel defensa. Vuelve a cae-y el balón pero nun define. Y nueva polémica col mesmu protagonista. Búscase la vida, llucha col central, faese cola posición, controla’l balón, y cuando va quedar cara a cara col portero, váltienlu. El Colexáu mandaba siguir.

Al final, empate a ceros. Quiciás agridulce, yá que’l Ciares puso contra les cuerdes a los llocales al final, totalmente impotentes, buscando perder tiempu. Poques ocasiones y pocu repartíes, toes al final.

El prósimu domingu espera un güesu, l’Unión Popular de Llangréu, y probablemente llegue con una de les grandes atracciones de la temporada en Tercera División, Michu. L’ex del Swansea llega a la vera’l Nalón pa disputar el campeonatu dirixíu pol so hermanu. Será la prósima selmana.