[Tiuya 1 – 0 Ciares] La segunda metá conderga’l Ciares

El Ciares cai pola mínima na so visita al Candín, tres un gran primer tiempu nel que tuvieron les ocasiones.

Repitiose la hestoria de la temporada pasada. Llegaba’l Ciares invictu a la séptima xornada, y rindía visita a unu de los gallinos de la lliga. L’añu pasáu tocaba el Llealtá, agora en segunda B, anguaño tocaba’l Tiuya, siempres remanando gran presupuestu pa la categoría. El pasáu cursu dibamosnos cola cabeza bien alta de Les Caleyes, anguaño faen lo propio del Candín.

Miguelín fixo bien los deberes mientres la selmana, y el Ciares presentábase meyor nel campu que los locales. Los teyeros apoderaben el partíu, llegaben a la área contraria. Forzaben córneres, faltes. Prendes poníala nel puntu penalti al sacar de banda. Los brickers queríen dinamitar el Candín.

Un de nuevu espectacular Davo albortaba la única ocasión visitante nel primer tiempu, tres blocar embaxo un disparu a espetaperru.

Sicasí, les más clares fueron pal Ciares. Jimmy tuvo la suya, balón dende banda esquierda que lu sirve Cris pero péga-y mal cuando lo tenía tou a favor y el balón sale demasiáu cruzáu.

Pablo Martínez asómase al puntu de penalti. Péga-y col alma pero atrapa embaxo Jose. Yera la segunda clara. Intentábalo tamién Aitor, pero’l so disparu cuando tol mundu esperaba’l centru blocabalu’l cancerberu local.

El speaker del Candín pulsió’l botón equivocáu, y 3 minutos antes del descansu facía les delicies de la grada pinchando’l Funiculi Funiculà, cantar que mientres el segundu tiempu acompañaría les espectaculares intervenciones de Davo cola lletra afecha al porteru del barriu teyeru.

Pulgar tuvo de lleer la cartiya al descansu. L’equipu dinamiteru nun yera’l mesmu na segunda parte. Emburrió, apertó. La quintaesencia del fútbol de garra.

Los asistentes al Candín pudieron esfrutar d’una exhibición de parkour al cargu de Davo, cuando repelió hasta en 3 ocasiones los disparos del Tiuya de manera estelante. Funiculi Funiculà. Perdona’l Tiuya nun córner, al rematar fora nel segundu palu con tou a favor. Nel siguiente córner, vuela Davo a la escuadra pa evitar el gol olímpicu. Funiculi Funiculà.

Cuando’l partíu asomabase al minutu 80 estenaba de puños, saliendo l’estene bombiáu. Villa, tres un nuevu refugue, marcaba a la media vuelta. Diez minutos pa buscar la heroica. La más clara pa Prendes, pero’l so disparu diba raspiándo¡l palu. Hubo tiempu pal discutiniu, tres la espulsión a Jorge Vázquez nel minutu 93 de manera desproporcionada.

Himnu na grada, y a pensar nel L´ Entregu. Un partíu que s’espera con ganes, entrega de trofeos a pichichi y meyor xugador de la pasada temporada, los dos Borjas, y a la llucha.