Un Domingu per importante

Mañana dende les 17:30 hores vamos encarar na cruz al Atlético de Lugones, un de los equipos más fuertes anguaño y que namás cedió dos puntos no que va de lliga, daqué qu’asocedía la pasada xornada ante un Urraca siempre per guerreru.

Los sierenses van presentase en La Cruz con prácticamente tolos sos efectivos disponibles, cola única esceición de Ardura, polo que los de César Suárez de xuru van lluchalo y van ser otra estorbisa na marcha d’un Ceares que ta sosprendiendo nesti entamu de temporada, a pesar d’un calendariu bien desfavorable.

Pela nuesa parte,  ye baxa’l nuesu capitán Jimmy, que tien de cumplir dos partíos de sanción tres la espulsión ante’l Covadonga, forzando a Nacho Cabo a buscar alternatives nel ataque. La solidez y el bon xuegu amosáu pol equipu nes últimes xornaes fáennos ser optimistes, anque ensin perder de vista lo complicao d’esta categoría y la gran igualdá reinante.

L’otru puntu importante de la xornada va ser el recibimientu y sofitu que va dase a los trabayadores de Tenneco, que siguen en llucha por caltener los sos puestos de trabayu ante l’amenaza de zarru de la factoría, y a los que la Unión Club Ceares convidó al partíu como humilde amuesa de solidaridá nunos momentos bien complicaos y de muncha incertidume.

Xornada bien importante poro, ¡toos a La Cruz!