[Uviéu B 1-2 Ciares] 45′ y 45′

Importante victoria la consiguida pol Ciares esti domingu pela mañana, nun partíu con dos partes bien diferencies, y marcáu poles variaciones ofensives dibuxaes por Nacho Cabo, xugando los 90 minutos ensin un 9 fixu.

El partíu quedó marcáu dende’l principiu. Apenes s’afixeren los aficionaos, si ye qu’esistía acomodu posible ante tanto fríu, cuando Pelayo Torre cruciaba’l balón y adelantraba al Ceares. Esi gol tuvo como efectu que’l filial azul entornárase buscando l’empate.

23 minutos duró’l sufrimientu, los que tardó n’empatar l’Uviéu B. El Ceares echóse tras, pero nun consiguía caltener el balón. Intentaba salir a la contra, pero yera rápido frenáu polos impetuosos xugadores locales. Ta claro que los brickers precisen el balón, quiciabes por ello empezaba’l partíu con Pichón y Jimmy, dos mediapuntes, turnándose en punta y bien combinativos, pero nun consiguíen contactar.

L’Uviéu creaba enforma apeligro, sobremanera per banda esquierda. Nun fueron poques les ocasiones en que triaben llínea de fondu y buscaben el centru tras, pero ensin ésitu. Kike yá salvara al equipu, sobremanera en disparu a espetaperru que supo estenar cuando la parroquia local yá cantaba l’empate. Nun pudo faer nada nel minutu 26, de nuevu xugada per banda esquierda y esta vegada sí’l balón llegaba a posición de remate. Empate.

El descansu sirvió por que el espectadores buscaren el calor del chigre, y por que el Ceares esclariara idees. Nacho Cabo tuvo impecable na cayuela, y como si d’un axedrez tratárase, redistribuyó l’ataque teyeru. Rigo quedose nel vestuariu, la tarxeta recibida na primer parte pesaba demasiao ante la banda por onde más atacaben los carbayones. Pichón, siempres impecable en tolos puestos nos que xugó, retrasaba la so posición pa empecipiar les xugaes, Meana cayera a banda, y Borja Argüelles asitiábase enriba. Y la segunda parte foi un recital.

Sicasí, el gol llegó como menos pensábamos. Fonso Bellón centra y el porteru local nun ye quien a sacala. Pero si Fonso nos diz que tiró, camudamos el párrafu…

Oportunidá pa Juan Carlos, con remate de cabeza que se va llambiendo’l palu, pa Jimmy, que lo intentó tres un refugue, y otra pa Juan Carlos, que cuando se cumplía’l 90 recibía un pase maraviyosu de Pablo Martínez pero’l so disparu nel unu contra unu díbase fora. Nin siquier puede dicise que la espulsión de Trabanco nel minutu 80 condicionara la resultancia, la segunda metá foi bricker, contra 11 y contra 10.

Los 3 puntos aúpen al equipu a la segunda plaza, que ya prepara el partíu del domingu en Ganzábal, onde se miden al primera clasificáu. El Llangréu nun sabe lo que ye perder esta temporada en campu propiu y apoderen con solvencia la lliga. Faigan les sos apuestes.