[Águilas 1-1 Ciares] Falta La Cruz
Casi 1000 kilómetros dixebren Xixón d’Águilas, pero nun foi disculpa por que 150 cearistas recibieren al so equipu a la llegada al campu con gaita y cantaraes.
Dicen los que más saben de fútbol que l’equipu que fai la primer entrada mete’l primer gol. Ayeri, Óscar Ruiz, a mediu metro de l’afición ciarista, metió’l primeru. El Ciares nun se diba engurriar. Por si fora poco, Ginés Meca intenta amedranar al linier y atópase cola afición cearista. El Águilas quería practicar l’otru fútbol, pero’l Ceares tamién sabe de qué va esto.
Águilas 1 – 1 Ceares
Águilas: Javi Soto, Fran, Edu Luna, Marco, Zurdo, Xavi (Lorca 6′) (Álex 81′), Emilio, José Manuel (Mara 55′), Crémades, Chiqui y Meca
Ciares: Pablo Díez, Fonso Bellón, Rigo, Borja Noval, Óscar Ruiz, Juan Carlos, Pichón, Pablo Martínez, Jimmy, Pelayo Torre (Meana 91′) y Borja Argüelles (Ponte 78′)
Goles: 1-0: Ginés Meca 65′
1-1: Pablo Martínez 88′
Árbitru: Pérez León (Castilla-La Mancha). Amonestó pol Águilas a Fran que nun va xugar la vuelta y pol Ciares a Pablo Martínez, Pelayo Torre y Ponte.
Incidencies: Alcuentru d’ida de la eliminatoria del play off pol ascensu a Segunda B disputau en El Rubial ante un millar d’espectadores, un centenar del Ciares. Terren de xuegu per secu y muy duru.
Primer cuartu d’hora d’embotellamientu local. Los estremos intentáblenlo costantemente pero nun creaben ocasiones. El partíu podía facese per llargu. Pablo Martínez foi’l primeru en quitase’l dominiu local. Internada a base de parés que falla nel últimu pase cuando triaba la área aguileña. Na siguiente yera Borja Argüelles el que-y facía un fíu de madera al central local en posición d’estremu zurdu y arrincaba el primera córner visitante. El Ciares yá taba na eliminatoria.
Ensin grandes ocasiones llegose al descansu. L’incidente ente la grada y Meca tensaba los ánimos.
La segunda parte arrincaba igual. El Águilas quería apoderar, pero los teyeros nun-yos dexaben esfrutar d’ocasiones. Y pasaben los minutos. Y a l’Águilas entrábenlu les prieses. Les hostilidáes empezaron con un zapatazu al llargueru. Plasmu pal Ciares, que nun tardaba en devolve-y la. Disparu duru de Pelayo Torre, el refugue cai-y a Jimmy que pon el pase de la muerte ensin atopar rematador.
Adelantrábense los locales. Falta dudosa en banda esquierda visitante, bien protestada. El centru acabó en gol. Pero nos peores momentos más apierta l’afición teyera. Habría eliminatoria mientres marcando. Salta Ponte al campu y entá espolea más a los siguidores. Primeru Borja Noval casi empata, pero pica demasiáu’l remate y vase percima del llargueru.
Minutu 88. Fonso saca de banda, Ponte gánala de cabeza y cede a Jimmy, que fuerza’l córner. Saca Pablo Martínez, pero refuga la defensa. Gran apertura d’Óscar Ruiz pa dexar de nuevu solu a Pablo. Controla, mira, y gol. El deliriu. Y falta la Cruz.