[Previa Playoff] Un Águilas vertical
Una defensa contundente, la creatividá de Lorca, unes bandes con desborde y los goles de Ginés Meca, son la columna vertebral del so fútbol.
Los play-offs d’ascensu a Segunda B siempres son una incógnita, la falta d’imaxes condiciona enforma les eliminatories y los equipos nun tienen una misión cenciella pa facer un scouting del rival que sea fiable. Nel casu de la Águilas FC, un equipu refundau apocayá, con namás tres temporaes d’hestoria, la dificultá amóntase entá más.
El nuevu Águiles vien siguir col llabor del anterior, un equipu con munchos años en Segunda B, que tenía mires puestes en Segunda División. Esa ambición escomanada posiblemente foi lo que los condergó, al aprobar un presupuestu bien alzáu na so temporada aciar.
A les traces, puede comentase que l’Águilas que se va atopar el Ciares esti domingu trátase d’un conxuntu que ye predresu tras y que cunta con dinamita enriba.
El porteru ta dotáu d’un bien bon cutu de balón y los centrales nun dulden a la d’estenar l’esféricu ensin miramientos. Trátase d’una exa de la zaga notable que nunca busca entueyos. Peles bandes, los llaterales tampoco paecen dispuestos a sumase enforma a les aventures ofensives. Amarrar tras resulta fundamental pa ellos pa nun sufrir en defensa.
Nel mediu del campu, Xavi encárgase de les misiones de contención y Lorca de la creatividá yá que se trata d’un mediu centru perbién dotáu técnicamente. Los sos interiores tienen por oxetivu apurrir velocidá al so fútbol, cunten con capacidá de desborde y busquen el centru dende la posición d’estremu con velocidá.
Nel ataque ta l’auténtica estrella del equipu, Ginés Meca. Treinta y cinco goles allumen el so palmarés esta temporada. De cabeza, con dambes piernes y dende cualquier posición. La so capacidá de definición ye tarrecida polos sos oponentes. Trátase d’un killer de la categoría, un xugador que marca les diferencies.
El Águilas cuando xuega n’El Rubial apuesta por un 4-4-2 como dibuxu tácticu y cuando actúa como visitante suel sacrificar a unu de los dos puntes pa incluyir un enlace y asitiase según un 4-2-3-1.
Tou fai indicar que se va tratar d’una eliminatoria igualada, ensin grandes diferencies ente dos bonos equipos a los que-yos gusta practicar un fútbol limpiu.