[Astur 1-1 Ciares] El Ciares tien el so puntu
El Ciares collecha un nuevu empate, nun alcuentru nel que de nuevu foi cimeru, pero nel que-y faltó eficacia ante la portería rival.
Dicen los más sabios que cuando non puede ganase, ye meyor empatar. Sicasí, paez que la X ye un resultáu que ta castigando yá demasiáu a los de Miguelín. Los coloraos vuelven güei a ser meyores, vuelven apoderar, lleven el pesu del partíu, pero encaxen gol na primer ocasión pal rival y eso lastra al equipu.
Astur 1 – 1 Ciares
Astur: Cano, Juan (Mariano 58′), Serrano, Trelles, Alonso, Casielles, Jonás, Pelayo Torre, Borja, Cris (Guillermo 73′), Turu (Álex 80′)
Ciares: Davo, Fonso, Lozano, Beni, Aitor, Prendes, Jorge Vázquez, Cris (Piñera 66′), Juan Carlos, Jimmy (Ponte 72′), Polo (Bryan 80′)
Goles:
0-1: Polo 14′
1-1: Serrano 34′
Árbitru:
Morís Martínez, del Colexu d’Avilés. Amonestó a Trelles polos locales, y a Beni y Bryan polos visitantes.
Incidencies:
Alcuentru correspondiente a la xornada 14ª de la Tercer División asturiana. Partíu disputáu nel campu Hermanos Llana. 250 espectadores. Tarde lluviosa. Terren de xuegu duru, pero rápidu por causa de la agua.
Repitíase esta tarde la hestoria nel Hermanos Llana. El campu uvieino, onde l’Estadiu Carlos Tartiere exerz como testigu d’esceición, los teyeros fueron el meyor equipu. Púnxose-yos el partíu de cara, pero nun consiguieron matalo. Y eso que nun se cumplió’l primer cuartu cuando Polo realizaba una fantástica xugada per banda derecha, diba metiéndose al mediu, y definía al palu curtiu.
Con superioridá nel marcador y sobre el verde, paecía clara la victoria visitante. Prendes encargábase de llimpiar el mediu campu, llegando a toos les cortes. Jorge Vázquez y Juan Carlos combinaben, y Polo, Jimmy y Cris buscaben sosprender. Los brickers primíen bien enriba, sobremanera los saques del porteru, bien pocu dáu a rifala, y a puntu taben de dar un plasmu.
Pero caprichu del destín, dempués d’una de les meyores xugaes del Ciares, nuna combinación con Fonso y Jimmy como protagonistes, llegaba’l gol local. Córner dende banda esquierda que se va llargu, pero’l balón vuelve ser colgáu dende la derecha y Serrano cabecia nel segundu palu. Xarru d’agua frío.
Restaben namás 10 minutos pal descansu, pero’l Ciares caltenía’l ritmu, y a puntu taba de dise al descansu con ventaya. Sería asina si Polu engabitara un balón que punxo Jimmy dende banda esquierda. Sicasí l’avilesín nun consiguía tresformar.
Empezaba la segunda parte como terminaba la primera. El Ciares buscaba afigurar la superioridá nel marcador. Jimmy tenía la primera, pero’l so balón díbase percima del llargueru. Pero antes, llego’l plasmu del partíu. Juan Carlos camudaba’l xuegu, Juan y Aitor saltaben a pol balón, y el terrible choque terminaba col llateral uvieín sacupáu al hospital, y con Aitor teniendo qu’intercambiar la camiseta con Rigo al tenela ensangrecida.
Miguelín realizaba’l primer cambéu al retirar a Cris, xugador bien vertical, por Piñera, xugador más combinativu. Coincidía colos meyores minutos del Ciares, xugando tol partíu nel campu del Ástur.
Nos postreros 15 minutos intercambio de golpes. Primero’l porteru local faíase un llíu, y regalaba el balón al Ciares, pero tres el centru dende banda derecha, Juan Carlos remataba de cabeza y atrapaba Cano.
La siguiente yera pa los uvieinos. Contraataque per banda esquierda, cambéu de xuegu, retayu y disparu al palu curtiu. Lliteralmente al palu curtiu. Darréu la más clara del partíu, y yera visitante. El Ciares entornáu buscando’l gol. Córner. El porteru atopa’l balón a la primera, y hasta en dos vegaes el llargueru repelía el gol.
Con esa ocasión morrería’l partíu. Cuartu empate consecutivu, y octavu en lliga. Al Ceares cuésta-y ganar, pero más-yos costar a los sos rivales ganalos a ellos. Metá alta de la tabla, y posibilidaes de engabitar esta fin de selmana de nuevu a los puestos altos. El sábadu, otru de los de riba, l’Uviéu B. Que nun falte naide.