[Urraca 1-1 Ciares] Ponte ye puntu

El Ciares garra un puntu en La Corredoria nun partíu estrañu dende l’entamu.

Si ya taba fríu’l día en Posada de Llanes al iniciu del partíu, xeló cuando Aitor orientaba un balón col pechu dientro la so área, y l’árbitru xiblaba que fuere col brazu. Polémica decisión, y el partíu condicionau con 85 minutos tovia por disputase. Íñigo engañaba a Kike y adelantraba a los locales, muy necesitaos de triunfos tres tres derrotes de siguío.

Sólo 8 minutos, y el vientu soplaba a favor de les pegues. El partíu volviose trabau, feu. En cada empareyamientu un xugador soltaba-y recau al so par. Anti fútbol, que beneficiaba más a los que diben por delantre. El Ciares siguía ablucáu en ataque, Juan Carlos nun recibía el balón y ehí los brickers sufren. Langarica llevaba peligru, a vegaes con habilidá, a veces con refugues. Nun pintaba bien.

Más de media hora necesitó’l Ciares pa empezar a crear pelligru, con una falta lanzada por Aitor que finaba en gol dempués de tocala Lozano de cabeza. Gol anulau, pero ya taba ehí. Los teyeros nun s’agachaben.

Pero la más clara foi pa los locales. Kike saca mal una falta y pasa-y el balón de cara a Ramonín, que nel un escontra un atópase col meta visitante. Lo comido polo servido.

Pablo Martínez y Chery incorporaronse al descansu. Rigo y Jorge Vázquez quedaben fuera. Prendes coyía’l llateral derechu, Juan Carlos y Pablo Martínez dirixíen el xuegu, Chery puñal pola izquierda y Cris puñal pola derecha. Al lío.

Primer xugada de la segunda metá. Ponte recibe en banda izquierda, encara a Ricardo y coloca-y una vaselina que se cuela pol palu llargu. Chicharru.

De nuevu parez que l’Urraca quier más el balón, pero nun ye a xenerar ocasiones. Lozano y Beni, imponentes esta tarde, achiquen los balones que llegen na so zona. Los locales namás creen pelligru bombiando corners. Las casualidades nun esisten, y a esti equipu namás-y metieron 7 goles en 12 partíos.

Nel minutu 72, col equipu solvente en defensa, pero ensin crear pelligru enriba, produzse l’últimu cambeu. Polo salta al campu en sustitución de Cris Alonso. Camudaba el Ciares de dibuxu, con un claru 4-4-2 sobre’l campu. Jimmy dexábase cayer a banda derecha, y Polo y Ponte, Ponte y Polo, enriba.

Llegaben los meyores minutos del Ciares. Sólo una ocasión pal Urraca, nun mano a mano de Marcos Iglesias con Kike, que refuga a bocaxarru tapando cola cara.

Los teyeros arrasen. Chery dispara cola mala y el balón raspia’l llargueru. Chery cientra per baxu, Polo revuélvese y apurre pa Ponte que con tou a favor remata fora, puede que molestau.

Pablo Martínez tuvo los sos minutos. Tiru que raspia la escuadra, tres espeye de puños de Ricardo. Dempués nuevu disparu del finu media punta que llambe’l poste, tres apoyase en Jimmy.

Postrera xugada del partíu. Prendes, Jimmy y Pablo filen una xugada bien guapa. Balón pa Pablo que entra na área y cae derribáu con árbitru y linier a escasos metros.

Berros de protesta, que se transformen en gritos de incredulidá, dempués d’impotencia, y finalmente rabia.

Y final del partíu.