[Avilés 1-0 Ciares] El Ciares mira-y a los güeyos al líder

A piques de sumar los teyeros na visita al Suárez Puerta. Un gol solitariu na primer parte dexa los puntos n’Avilés.

Buen partíu de los de Tino, que supieron plantar cara al líder de la categoría, llevando’l nerviosismu a les graes del Román Suárez Puerta.

L’Avilés, pela so parte, suma los 9 últimos puntos en xuegu y supera al filial del Sporting na carrera pol lideralgu.

Baxes obligaes otra vegada nel Ciares. Marcos Iglesias vería a los compañeros dende la grada, al cumplir ciclu de tarxetes. Pablo Martínez yera baxa por lesión, y el so puestu cubríalu un Dani Peláez que tornaba al once.

La primer media hora tuvo sabor llocal. Y eso que Javi Gutiérrez pudo adelantar al Ciares nuna ocasión clara. Sicasí, tres tiros a los palos y un gol anuláu fizo acreedor al Avilés de merecimientos a los puntos.

El gol llegaba cuando taba a puntu de cumplise la media hora. Tres rechace nun córner, balón perriba que pilla saliendo a la defensa del Ciares, control col pechu de Palazuelos y gol a bocaxarru.

Sin embargu, el gol cambió la dinámica del partíu. Los de Pablo Lago paeció que daben un pasu atrás y los de Tino diéronlu alantre. Dos escapaes de Javi Gutiérrez, una per cada banda, anque algo escoráu, llevaron la inquietú a la defensa blanquiazul. La segunda d’ellos acabó con disparu al palu curtiu y parada del cancerberu llocal.

Al filu del descansu llegó una xugada clave. Gran maniobra de Guille Barquero en mediu campu. Un centru dende la banda izquierda remátalu de cabeza Jorge Cayarga a gol, pero l’asistente decreta fuera xuegu. Mui protestáu, el propiu Jorge veía tarxeta.

Demientres la segunda metá diba igualase’l choque y la posesión. El primer sustu dábenlu los llocales, tres d’un córner el balón diba pegadín al poste. Diba ser la última clara pa los de Lago hasta los últimos minutos, cuando pudieron sentenciar con delles contres clares.

Buena xugada de Natan pela banda, con pase atrás pa disparu de Guille Barquero que despexaba’l porteru llocal. Empezaben les hostilidaes. Guille Barquero, que tuvo mui activu durante l’alcuentru, cede atrás pa Chery, que dispara cola pierna menos buena buscando la escuadra contraria. Vase altu’l balón. Otra pa Guille, buena xugada pel estremu zurdu, desborda, y cuando lo tenía too a favor empapizábase de balón y el disparu marchaba mui arriba.

Nos últimos minutos, intercambiu de golpes. El Ciares buscábalo con too y l’Avilés intentábalo a la contra. Xugada rápida pela banda derecha de los llocales, balón al segundu palu y con too a favor remata mal el xugador avilesín y el balón marcha fuera. Iván Suárez, qu’acababa d’entrar sustituyendo a un siempre xenerosu nel esfuerzu Hugo, tuvo la más clara. Llegába-y un rechace y el so disparu despexábalu la defensa baxo palos.

De nuevu rápidu contra ataque pela banda derecha llocal. Pícala nel mano a mano con Nacho pero vase al poste. La última del partíu foi pa’l Ciares. Balón que-y queda en buena posición a Dani Peláez na frontal del área, dispara duro pero marcha llixeramente perriba.

Al final quedaben los puntos en casa. Partíu entreteníu, con ocasiones pa los dos equipos, y un Ciares que dexó buen sabor de boca. Agora continúa la etapa d’alta montaña, recibiendo a un Uviéu B asitiáu en puestos de play-off. Un partíu que resulta siempre entreteníu y vistosu. Otra ocasión pa acercase a los d’arriba.