[Ciares 2-0 Siero] Tambores de guerra

El Ciares vence con facilidá al Siero en La Cruz, na entesala d’un tramu de calendariu aptupara solu pa valientes.

Sigue Tino del Corzo creando l’once d’entamu a base de quebraderos de cabeza. Pa recibir al Siero, les novedaes principales veníen pela banda derecha. Natan, estremu diestru, retrasaba la posición pa convertise nun llateral d’ataque. Per delantre acompañábalu Cris, que ficiera buen partíu en Llugones la selmana pasada pela banda zurda. Javi Gutiérrez, pela do parte, acompañaba a Marcos en punta. Na primer metá, poca historia. El Siero tuvo la primera, con un intentu de vaselina dende llole que diba mui arriba, y nun volvió a crear peligru sobre la meta que defendía Nacho. El Ciares tampoco amosó muncho. Una buena falta de Pablo Martínez que refugaba’l porteru terminaba con gol de Marcos Iglesias, anuláu por fuera xuegu. O Chery, nuna gran xugada hasta la llínia de fondu con un centru que marchaba mui pasáu. Na segunda metá desatábense les hostilidaes. Los teyeros barrieron lliteralmente al Siero del prau. Infinidá d’ocasiones de gol, con un xuegu trenzáu mui vistosu. Apenes daben comienzu estos segundos 45, gran xugada de Natan con balón atrás pa Marcos qu’adelantaba a los llocales. Novenu gol esta temporada pa l’ariete xixonés, que suma y sigue. Pasaos los 60 minutos llegaba la sentencia. Buen balón pa Jorge Cayarga, que fizo lo que la situación requería, controlalu y llevantar la cabeza. Mete’l pase per baxo pa que Cris se llance y suba’l segundu al marcador. A partir d’ehí, galerna llocal. Primero Marcos, que pudo consiguir el doblete, pero despexaba’l defensa a córner. O Cayarga, que quedaba solu ente’l porteru tres d’un gran pase de Javi Gutiérrez pero nel intentu de superalu per baxo yera’l porteru quien s’imponía. Tamién Javi Gutiérrez, con una gran xugada na llínia de fondu, marchando de dos y centru cola pierna zurda que nun atopaba rematador. O Aitor Cañedo, que llanzaba una falta con muncha intención, tuvieron ocasión pa mover el marcador. Sicasí, calteníase’l resultáu. El calendariu vuélvese temible agora pa’l Ciares. Avilés, Uviéu B, Cuadonga, Llanes y Sporting B. Casi nada. Los de Tino consiguierom agarrase al tren de los gallos tres d’un aniciu de temporada difícil. La clasificación paez partise ente los equipos que busquen clasificación pa la Copa Federación y los que van lluchar por nun descender. Suenen tambores de guerra en Ciares. El calendariu ye afayaízu pa valientes.