[Ciares 1-0 Andés] Cañonín Ponte
Presentábase ceu l’Andés, necesitáu tres la goliada encaxada la pasada selmana como local. Llegaba dempués el Ciares. Con 3 puntos na clasificación, buscando 3 más. Partíu mañaneru dominical en Ciares, siempres una caxa de sorpreses.
Empezaba apoderando’l xuegu’l Ciares, col so nuevu estilu metía tras al Andés. Asina, tres tan solo diez minutos, internábase Ponte per banda esquierda. Retayaba. Y cuando paecía que la diba dexar de cara a Jimmy, frayaba a Carrera pol palu curtiu de la so portería. Un Ponte en racha, segundu gol en dos xornades de lliga, más los consiguíos en Copa Federación.
Ciares 1 – 0 Andés
Ciares: Davo, Rigo, Prendes, Beni, Aitor, Jorge (Lozano 77′), Juan Carlos, Pichón (Cris Alonso 65′), Jimmy, Chery (Pablo Martínez 55′) y Ponte
Ciares: Carrera, Álvaro, Rober, Guzmán, Dieguito, Kafú, Manolo (May 85′), Modesto (Uve 77′), Pablín, David y Sergi
Goles: 1-0: Ponte 10′
Árbitru: Mata Areces (Uviéu). Amonestó pol Ciares a Davo, Prendes, Rigo y Cris Alonso.
Incidencies: Alcuentru correspondiente a la segunda xornada de Tercera División en La Cruz ante unos 350 espectadores. Terren de xuegu en perfeutes condiciones.
El restu de la primer parte pasaba con más pena que gloria. El Ceares quixo dexar más el balón al Andés, pero los naviegos nun yeren capaces de ver de cerca a Davo, espectador d’esceición mientres los primeros cuarenta y cinco.
La nota de calidá poníala Aitor Cañedo. Pica’l balón pa dise del primeru. Pica’l balón pa dise del segundu. Centru col interior al segundu palu pero llega antes un defensa.
Al descansu ensin novedaes. El Ciares nun quier, el Andés nun puede. Sicasí la segunda parte nun diba ser igual. El Andés sí quería’l balón, y anque de manera tosca, empezaba a asomarse a la área local.
Salía Pablo Martínez por Chery apenes dieren comienzo los segundos cuarenta y cinco minutos. Jimmy dexábase cayer a banda esquierda, posición qu’ocupara tamién mientres unos minutos en Roces. El Ciares quería la posesión.
El reló corría escontra’l Andés. Pero entá más corría Cris Alonso, que sustituyera a Pichón y llanzaba les contres. Hasta 3 vegaes crearía peligru a la zaga naviega. La postrera d’elles la más clara. Pablo Martínez da la vuelta con elegancia, xuega pa Juan Carlos. Balón al buecu pa Cris que retaya y dispara buscando’l palu llargu.
Balones bombiaos y pocu más buscando la área de Davo. Los trés puntos quedábense en Los Pericones. Y yá lleven seis. Colíderes.