[Ciares 1-0 Industrial] Los 3 puntos del derbi queden en La Cruz

El Ciares fixo valir la so calidá y la so solidez ante un Xixón Industrial perdíu na primer parte, pero que pudo dar un plasmu na segunda.

[youtube]https://www.youtube.com/watch?v=P7hnI5lLrGk[/youtube]

Munches vegaes les diferencies nos partíos marcales la solidez que presente cada equipu. Un conxuntu llaráu de novedaes nes sos files parte de cero en pretemporada y tien enforma trabayu por faer. Sicasí, otru que caltien la so columna vertebral y el so estilu nun fai sinón ameyorar dende lo yá trabayao enantes. Daqué asina pudo vese en La Cruz nel derbi ente Ciares ya Industrial qu’abría la temporada liguera na TerceraDivisión División pa los dos equipos xixoneses. Frente al calter predresu y ensin casi fisuras del conxuntu teyero, presentóse un equipu fabril que evidenció que-y queda enforma trabayu entá per delantre pa llograr una perfecta conxunción como equipu.

Miguelín plantega nos sos alcuentros un auténticu muriu na zona central del campu, los sos llaterales xueguen bien adelantraos y el Ciares tien muncha presencia na zona central. Esi factor resultó clave pa que na primera metá nun hubiera más forno sobre’l campu qu’el teyeru. Los mediocampistes del Xixón Industrial prácticamente nun esistieron; y namás defensivamente l’equipu amosóse competitivu. Asina, yá a los dos minutos de xuegu tuvo una ocasión el Ciares nos pies de Marcos Iglesias, que disparó ensin ésitu. Cuatro minuto dempués, nun saque de banda dende la derecha, peñó Beni y el balón llegó-y a Natan na frontera l’área, que chutó esviáu.

El Gijón Industrial nun s’averaba siquiera pela portería defendida por Davo y namás en dalguna qu’otra ocasión llogró dexase ver tímidamente, como nun saque de puerta de Roberto a los doce minutos que peinó p’atrás l’ex ciarista Jorge Vázquez y al que nun llogró llegar el delanteru Carlos Pajín por pocu. La meyor ocasión pal Industrial en tola primera metá creóla Queipo de la nada con un intentu de sosprender a Davo nun disparu dende’l círculu central que nun tuvo consecuencies.

El Ciares siguía xugando casi a prestar, con casi tolos sos homes d’ataque faciendo dañu en cada ocasión que tocaben el balón. Ponte y Marcos Iglesias fueron una velea pa la zaga albigrana, bien secundaos por un Cris Alonso y un Natan que pueden dar munches allegríes nos estremos esta campaña. Y asina, a base de xenerar ocasiones, a los ventidós minutos llegó’l gol llocal nuna xugada d’estratexa. Un saque de falta dende la esquierda botáu al segundu palu cabeciáu por un xugador del Ciares al palu contrariu, onde s’atopaba oportunu Fonso pa bater a Roberto. El gol facía xusticia a lo que se vía sobre’l verde.

Paeció relaxase un tanto el conxuntu de Miguelín tres el gol, lo que dio nales a un Indus peleón p’avanzar unos cuantos metros en busca del empate, pero’l que siguía xenerando ocasiones yera’l Ciares, con un perrápidu Marcos Iglesias, que-y robó la cartera al llateral, llogró permediase col balón y buscó’l disparu rápidu a portería a la media vuelta, pero fóise-y fora. Tres esa ocasión, un pequenu periodu d’igualdá ensin demasiaes ocasiones que duró hasta’l descansu.

Salió Miguelín col mesmu once na segunda metá; non asina Felipe Vega-Arango, que dio entrada a Borja López nel centru’l campu y a Sami na delantrera por Hugo y Carlos Pajín. Funcionaron los cambeos y el conxuntu albigrana permedió les fuerces nel partíu. Ello ye que’l primer acercamientu al área foi del Indus, con un disparu a los cincuenta y tres minutos de Borja López que llegó ensin apuros a les manos de Davo. Devolvió la xugada’l Ciares al minutu siguiente con un remate d’Aitor Cañedo que se foi por bien pocu. Controlaba’l partíu’l conxuntu bricker, pero baxara un tanto’l ritmu y eso aprovechólo’l so rival pa crecer. Aitor Cañedo vio la mariella por un agarrón siguíu sobre Cristian cuando esti diba a toa velocidá nun contragolpe peligrosu.

De toes formes, les ocasiones más clares siguíen siendo pa los llocales. Nel minutu sesenta y ocho

Cris Alonso enchió de nuevu al so par pola esquierda, llegó a llínea de fondu y sacó un peligrosísimu centru qu’estenó con apuru Álex so palos. El Indus intentaba sosprender con dalgún contragolpe, y a puntu tuvo de faelo con un centru perllargu de Jorge Vázquez escontra Borja, al que-y faltaron dellos centímetros d’altor pa poder rematalo. Darréu, Ponte respondía con un violentu chut al palu. Yeren minutos de fútbol abiertu, y nos que la salida del campu d’un incisivu Cris Alonso nun-y vieno bien al Ciares, que baxó dellos enteros nos últimos quince minutos de partíu. Foi’l momentu qu’aprovechó’l Xixón Industrial pa gastar los sos últimos cartuchos. Y nun consiguió l’empate de milagru nun saque d’esquina botáu por Queipo. El balón llegó al primer palu y apaeció Yoni pa rematar casi a espetaperru contra’l llargueru. Foi la última ocasión del Indus pa llevase daqué positivu de La Cruz. El Ciares espertó del pequeñu lletargu y yá nun dio más opciones al rival. El tiempu foi entós pasando ensin más acciones destacables hasta que l’árbitru decretó’l final del partíu.

Bon trunfu teyeru, que dexaría bien bones sensaciones a los sos aficionaos. Dicía Miguelín va pocos díes que l’oxetivu del so equipu yera lluchar por tar enriba; y nesti primer partíu de lliga dio la sensación de poder cumplilo. Otru oxetivu distintu tien el Indus, el de la salvación; y evidenció qu’entá-y queda enforma trabayu per delantre pa faer funcionar la maquinaria al cien por cien.