[Ciares 1-3 Marino] A siguir puxando
Media hora de buen xuegu valió-y al Marinu de Lluanco pa llevar los puntos de la Cruz ente un Ciares qu’entovía nun puntuó.
Y ye que’l fútbol a veces nun siempre ye sólo xugar meyor o correr más. Cuando la presión échate pa atrás o cuando tienes miéu, les coses nun salen. Güei los xugadores llocales viviéronlu, cuando teníen un partíu controláu, con victoria momentánea, y un balón al llargueru del Marinu, nel primer disparu, disparó los temores y cambió l’alcuentru.
Ciares 1 – 3 Marinu
Ciares: Nacho, Iván, Fonso, Beni, Chery, Hugo (Javi Gutierrez 80´), Dani Peláez, Pablo Martínez (Natan 70´), Juan Carlos, Cayarga (Cris 67´), Marcos Iglesias
Marinu: Davo, Borja, Omar, Trabanco, Gauya, Llerandi, Pablo Hernández, Dani Pevida (Aitor 87´), Álvaro, Coutado, Jairo Cárcaba
Goles:
1-0 Marcos Iglesias 40′
1-1: Jairo Cárcaba 65′
1-2: Polo 73′
1-3: Polo 89′
Árbitru: Ladreda Mochales, del Colexu d’Uviéu. Amonestó a Dani Peláez, Juan Carlos y Beni. Sin amonestaos nos visitantes.
Incidencies: Buena entrada nel Campu La Cruz, con 350 espectadores. Terrenu de xuegu n’estáu perfectu.
Yá apuntaben mal les coses cuando nel calentamientu Aitor Cañedo cayía mancáu. La solución yera Iván Suárez al llateral derechu y Fonso que pasaba a formar pareya con Beni nel mediu de la zaga. El restu, los que veníen de xugar un gran partíu ensin premiu en Tiuya.
La primer parte yera soporífera. Ningún de los dos equipos llevaba peligru, nin siquiera buen xuegu. El Ciares tirando más balón llargu de lo avezáu, pero yeren balones mui directos que nun complicaben a los visitantes. El Marinu pela do parte tampoco dexó imaxen nestos primeros 45 d’equipu con pretensiones de play-off, yá que nun foi quien a crear una sola ocasión de gol.
El Ciares tuvo dos. La primera, un gran disparu de Juan Carlos de primeres cola pierna izquierda que se perdía xunto al palu derechu de la meta defendida pol Davo menos conocíu en La Cruz.
Na segunda llegaba’l gol. Gran balón de Dani Pélaez con rosca que Marcos enchufaba de cabeza. Y sólo quedaben 5 minutos pa’l descansu.
La segunda metá discurría pelos mesmos derroteros, poco fútbol y 0 ocasiones. El Marinu nun apretaba y el Ciares nun sufría. Hasta que llegó la xugada clave nel minutu 60, disparu dende’l mediu campu con Nacho adelantáu, que paez que va ser gol, pero tres d’el bote estréllase nel llargueru. Suspiros aliviaos.
A partir d’ehí el Marinu apretó y el Ciares echóse atrás. Viesca montó un destrozu pela banda izquierda y el Marinu diba acercándose y yá empezaba a llevar peligru.
Jairo Cárcaba subía l’empate al marcador, al cabeciar un centru y superar pelo alto a Nacho. L’ariete xixonés pasara totalmente inadvertíu hasta esi momentu.
Ocho minutos dempués, otru ex ciarista marcaba a los teyeros. Posición duldosa de Polo, que sorprende a toos con un disparu ensin ángulu qu’entra pel primer palu cuando paecía que diba fuera.
Esi gol foi una llosa insuperable. Nin tan siquiera la entrada de Javi Gutiérrez sustituyendo a Hugo complicó la vida a los de Lluanco, que sentenciaben a la contra nel 89, nun dos pa ún ente Nacho nel que Cárcaba dexaba pa Polo que de nuevu marcaba.
Otru palu pa los llocales, que siguen ensin inaugurar el casilleru de puntos tres 4 xornaes. Toca llevantar l’ánimu. Otra oportunidá será’l domingu frente al Condal en La Cruz.