S.D. Tordoia 2-3 Xixón F. Femenín

Gran partíu del Xixón Femenín en A Coruña, que tuvo que remontar 2 goles mui tempraneros.

Y ye qu’a los siete minutos del entamu del xuegu encaxáron-yos el primer gol, nuna xugada ensin apenes peligru; pase atrás a la portera que la pilló a contrapié. El segundj gol llegó nel minutu 30 nuna falta llanzada a 2 metros de la frontal del área y en clamorosu fuera de xuegu que’l llínia nun quiso ver. Aún así, les nuestres xugadores nun se vinieron abaxo y siguieron atacando, con gran tiru al palu llanzáu por Paula. Les xixonesed yeren dueñes del partíu. Maribel, con una xugada pela banda derecha tuvo a puntu de marcar con un gran disparu y una gran parada de la portera Andrea. Por fin, nel min. 42 obtuvieron los sos frutos gracies a la constancia con un gran gol de Carla, y así se llegó al descansu col 2-1 nel marcador. Arrancó la segunda metá igual qu’acabó la primera, col dominiu absolutu del Xixón, y resolviendo con solvencia la defensa les poques llegaes de les gallegues. Nel minutu 47, pase en llargo a Carla que resuelve perfectamente, unviando’l balón al llau derechu de la rede, algamando l’empate. A partir d’ehí l’acosu foi total per parte del nuestru equipu, tanto que nel minutu 74 pitóse penalty nuna internada de Paula pela banda izquierda nel área na que la portera llegó a destiempu, arrollándola. Penalty llanzáu por Zara obteniendo’l gol de la victoria. Control absolutu de les xixoneses hasta’l final del alcuentru. Mui buen partíu del Xixón F. Femenín, que na próxima xornada, a disputase en dos selmanes, recibe a El Olivo nos campos de la federación de Roces.