[Ciares 2-1 Condal] El Ciares ta de vuelta
Un doblete de Javi Gutiérrez dexa los tres necesitaos puntos en La Cruz ente un Condal que fizo sufrir a los teyeros nos minutos finales.
Cambiaba esta selmana Tino’l dibuxu tácticu. Un claru 4-4-2 con Javi Gutiérrez y Marcos Iglesias arriba, con Juan Carlos retrasando la posición xunto con Dani Peláez, y con Cris debutando como titular pela banda derecha. Los damnificados yeren Hugo, fuera de la convocatoria por lesión, y Pablo Martínez, qu’aba’l partíu dende’l banquín.
Ciares 2 – 1 Condal
Ciares: Davo, Fonso, Aitor, Beni, Chery, Juan Carlos, Dani Peláez, Cris (Guille Barquero 63′), Cayarga (Pablo Martínez 78′), Marcos Iglesias, Javi Gutiérrez (Natan 87′)
Condal: Jesús Lastra, Zapico, Óscar Ruiz, Óscar, Mori, Aitor Elena, Rueda, Alberto, Javi Álvarez, Juanín (Aitor Hervás 45′), Fasani
Goles:
1-0: Javi Gutiérrez 35′
2-0: Javi Gutiérrez 58′
2-1: Fassani 86′
Árbitru: Marinero Noval, del Colexu d’Uviéu. Amonestó a Cris, Beni y Guille Barquero pol Ciares, y a Zapico, Aitor Elena, Óscar, Óscar Ruiz, Mori, Imaz y Jesús Lastra pol Condal.
Incidencies: Gran entrada nel Campu de La Cruz, con más de 400 espectadores. Terrenu de xuegu en perfectu estáu. Nos prolegómenos guardábase un minutu de silenciu por “Rufo”, sociu históricu y collaborador del Ciares.
Llegaba’l Condal a La Cruz. L’equipu chacineru yera campeón de la categoría va 2 años, y caltién bloque y xugadores pa optar a repetir play-off, quedándo la temporada pasada a les puertes. Óscar Ruiz yera un de los atractivos del partíu, aquel llateral que llegó xoven al Ciares, y destacó de la mano de Nacho Cabo, recalando posteriormente nel filial del Uviéu.
La primer parte nun va pasar a la historia del fútbol. Escasez d’ocasiones de gol. El que más lo intentaba pol Condal yera precisamente un mui motiváu Óscar Ruiz. Una xugada suya terminaba con remate de tiesta que salvaba Davo. La xugada yera anulada por falta sobre Beni nel saltu.
El Ciares xugó mui templáu. A pesar de la ansiedá pola clasificación, los de Tino supieron marcar el ritmu del alcuentru. Dani Peláez y Juan Carlos marcaron los tempos, faciendo xugar a los sos compañeros. Cayarga y Dani, cada un dende’l so perfil, lleven peligru amás nel balón paráu.
Estrenábase Javi como goliador con muncha clase. Balón a la espalda, intérnase pel perfil diestru y definía mui bien abaxu, al palu llargu, pegadina el poste. Munches esperances depositaes nel ariete xixonés.
Los segundos 45 minutos entamaben con un Chery pletóricu. Dos xugaes consecutives pela banda izquierda, poniendo’l centro perbaxo pero ensin alcontrar rematador.
De nuevu Javi volvía a semar el pánicu na defensa chacinera, a los que sacaba los colores. Marcha col balón pela banda derecha, y sírve-y un buen balón a Marcos, pero conseguía despexar la defensa a córner.
Otra vez Javi pela so banda derecha internábase nel área, sin pase al mediu, llanza un llatigazu arriba al palu curtiu y sube’l segundu. Auténticu golazu amestando fuercia, clase y definición.
El Ciares foi dueño y señor demientres la segunda metá. Un Condal inoperante yera incapaz de crear peligru, nin tan siquiera d’asomase al área defendida por Davo. Paecía muncho más cercanu’l 3-0 que’l primeru de los visitantes.
Pudo conseguise’l terceru nun tres pa un que cortó Mori con una entrada durísima a la altura de la rodiella de nuevu sobre Javi. El central, avezáu a nun faer prisioneros, veía una tarxeta mariella con tonalidaes naranxes. Nun foi la única, el Ciares tuvo delles contres cortaes en falta por un Condal espertu. La última d’elles veíala Óscar Ruiz, que se vio desbordáu por Natan y llanzaba un 2 pa 1.
Sólo Fassani, nel únicu balón que tocaba nel partíu, llevaba la incertidumbre al resultáu. Resolvía mui bien d’espaldes y batía a Davo. L’ariete tien gol y de cada balón saca petróleu.
Les últimes y desesperes acometíes resolvíales Davo. Gran partíu de los llocales, mui superiores a los de Noreña. El Ciares sal de descensu y sube un ánimo que venía tocáu. Agora toca Posada’l domingu, toca l’Urraca. El Ciares vuelve