[Ciares 2-1 Astur] La vida ensin Jimmy
El capitán del Ciares despidióse con una victoria ente l’Astur y contribuyendo a la clasificación del equipu pa la Copa Federación.
Y Jimmy dixo adiós a La Cruz. El que pa la mayoría de los aficionaos ciaristes ye l’únicu capitán que conocieron, dexó’l so puestu nel prau a Pablo Martínez, mientres quitaba per última vez esi brazalete que llució con arguyu per toa Asturies, y per parte de la península.
Y ye que si en tou equipu la figura del capitán ye importante, nel Ciares yelo muncho más. Nel admiráu fútbol inglés siempre se respeta especialmente al gran capitán. Esos xugadores qu’añu tres añu llucen la camiseta, homes de club. Arguyosos del so escudu. Nexos de unión ente la plantiya y el restu d’estamentos. Saltando los primeros al prau, y marcando’l ritmu que los lleva al centru del campu a saludar.
Jimmy yera’l capitán del Ciares. Siempre l’exemplu pa los más mozos. Siempre amosando qu’había qu’entrenar a tope, sin güecu pa la relaxación. Elegante col contrariu. Dando un puñetazu na mesa cuando facía falta, y dando sofitu a los compañeros cuando la ocasión lo merecía. Siempre discretu, coles botes adidas negres como antaño, nunca creando polémica nin problemes.
Pero Jimmy cree que llegó’l momentu d’echase a un llau. El so llabor foi impecable, pero busca otra cosa. Dexó exemplu, y xugadores con capacidá y carácter pa llucir brazalete tamién. Xente mozo, pero que lleven unes temporaes sintiendo al Club. Saben que’l Ceares nun ye como los demás, y los xugadores nun pueden ser como los demás. Abanderen otra forma de sintir el fútbol. Los xugadores del Ciares son los primeros hinches del so propiu club.
El partíu yera obligáu. La victoria daba accesu a la Copa Federación esti veranu. Y resolvióse, con brillantez na primer parte y sufrimientu na segunda. Por tercer añu consecutivu, va haber tornéu oficial veraniegu en Ciares.
L’esquema de tolos esquemas yera’l que dibuxaba Eraña na pizarra: 4-4-2. Juan Carlos atrás, con Beni, y Aitor caía a la banda izquierda. Dani Girón yera la maniya, con un Jimmy que pasaba al mediu’l prau. Chus Naves y Dani Hevia yeren novedá peles bandes, con Ponte y Marcos Iglesias arriba.
En 2 minutos resolvíase too. Primero Ponte emburriaba casi sobre la llínia un balón pol que se pelearen tantu Jimmy como él tres d’un llanzamientu de córner. Dempués Marcos Iglesias emburriaba a portería vacía un gran pase servíu pol homenaxeáu Jimmy.
Paecía un día tranquilu. Apenes dos llegaes palos uvieinos na primer metá. Un disparu dende la frontal qu’atrapaba seguru Davo, y un remate al segundu palu onde’l cancerberu llocal volaba pa mandala a córner.
La segunda parte paecía tranquila. Nel minutu 63 Jimmy dexaba’l sitiu a Pablo Iglesias. Y paraba’l tiempu per un ratu.
Diez minutos dempués, cuando paecía que nada diba pasar, l’Astur algamaba un gran gol al batir perriba a Davo. Y too se volvía preocupante. Pero acabó así, y el Ciares consigue’l pasaporte. El Ciares lleva 70 pretemporaes na so historia, y esta paez que va ser especialmente prestosa. Y cola Copa, más.