[Ciares 3-3 Tiuya] Beni, vidi, vici

Un gol del central xixonés nel postreru segundu del tiempu añedíu remata una increíble remontada del Ciares.

[youtube]http://youtu.be/NMkPXuDvMLk[/youtube]

Paez claro que nel fútbol los puntos non siempres valen lo mesmo. Dempués d’esti partíu más inda. Ceares y Tiuya sumen un puntu ambos, pero tien distintu sabor, y distintu valor. El Tiuya viose con 3 puntos nel bolsu, y prácticamente refugando al Ceares de la so llucha. L’empate sabrálu a pocu al conxuntu arlequinau.

Pero en La Cruz esti puntu súpo-yos a gloria.

Munches baxes brickers pa esti partíu. Lozano, Jimmy, Prendes y Cris quedábense fuera. Namás Prendes camudábase, con presencia testimonial nel banquín. Aitor Cañedo diba al centru de la defensa, formando pareya de centrales zurdos con Beni. Chery facíase col puestu de llateral. En mediu campu Jorge Vázquez acompañaba a Juan Carlos, y enriba dupla de delanteros: “Ponte Polo” pa los aficionaos ciaristas.

El primer tiempu forxóse a base de Lleis de Murphy. Trés llegaes del Tiuya, tres goles. Los trés cayeron como lloses. Pesaben les piernes, pesaba l’ánimu. Nin siquier el fondu sur de La Cruz sonaba como otros domingos.

Apenes empezara’l partíu, un balón sueltu engabitábalu Rubo que nun perdonaba. Nun pasaba nada, terminaba d’empezar el partíu.

Los posteriores minutos, nun dexaben prever lo que más tarde pasaría. Con munchos minutos per delantre, el Tiuya dio un pasu tras. El Ciares podía llevar peligru.

Sicasí, superaos los 20 minutos disparu dende la frontera de Villa que se cola pol palu curtiu de la meta defendida por Kike. Otru mazazu. Esti yera duru, direutu al mentón.

De momentu, mano de Jorge Vázquez dientro de la área y penalti. Alonso nun fallaba y el 0-3 xubía al marcador. El Ceares díabse a la lona y raspiaba el KO, pero llevantábase.

Espertó l’equipu, y espertó la grada. Polu remató al primer palu pero refugaba’l porteru. Y Ponte tenía la última antes del descansu. Nesos momentos paecía importante marcar antes de los primeros 45′.

Empezó fuerte’l conxuntu teyeru na segunda parte. Ábanu de centros y refugues primeru, y bona xugada con disparu final altu de Jorge Vázquez dempués. Había vida. Sicasí, el Tiuya baxó’l ritmu del partíu. Yá nun se llegaba a la área. El partíu taba dormíu. Y entá más cuando Pablo Martínez recibía una entrada de Luis Enrique y retirábase acoxando. Otru golpe de los que más forguen, déxente taramellándote.

Pero Bryan, qu’entró sustituyendo a Pablo, remataba picáu un serviciu de Juan Carlos dende banda derecha. Yera’l 1-3, quedaben 24 minutos. El siguiente nun se fixo esperar, chilena de Polo, el balón tardó n’entrar lo qu’a dalgunos parecionos una eternidá, mientres el porteru visitante faía la estatua y conviértese en testigu d’esceición d’unu de los meyores goles que se vieren na Cruz nunca.

Calecíase’l partíu. El Tiuya complicárase la vida. El Ciares mentanto veníase enriba. Kike realizó la parada del partíu. Jandro retayaba dientro de la área, perdía’l balón pero volvía caye-y, y el so disparu al palu curtiu salvábalu el cancerberu llocal.

Entramos nel descuentu. El primeru amagu d’infartu dábalu Ponte. Remate a espetaperru que vase altu. Paecía la postrera. Pero La Cruz date sorpreses, sorpreses te da La Cruz. Balón buscando a Beni, que terminaba’l partíu a lo Alexanco, de 9. Controla empobináu col pechu y dispara ensin dexala cayer. Golazu de bandera. Y el Tiuya díbase a la lona.