[L’Entregu 0-1 Ciares] El triunfu d’una afición

El Ciares llévase un partíu marcáu a fueu pola afición teyera, al visitar al rival con más exjugadores ciaristas. Perimportante na llucha pol play-off.

Si había un equipu del que se falara en La Cruz mientres esti branu, aparte del Ciares, yera del Entregu. Los fichaxes de los dos Borjas, Argüelles y Noval, esti branu, xuníu al de San Eloy la temporada pasada, nun yera aceptáu d’acordies. Esti mercáu ivernizu sumaben a Rigo, amás d’a Jorge Vázquez, y aumentaben la so lleenda.

El fútbol nunca va ser esautu. Basta echar una güeyada a la plantiya de L’Entregu pa dase cuenta de que ye un equipazu. Sicasí, güei pasóse 90 minutos ensin llevar peligru a la área que defendía’l Ciares.

Dambos equipos paecen tar bien llueñe. Non yá na clasificación, sinón tamién n’otros aspeutos directivos.

Yá dende’l primer momentu’l Ciares paecía meyor plantáu. La primer xugada del partíu terminaba con una peligrosa falta a favor de los visitantes.

Cuando namás se llevaben diez minutos apostaos, el exciarista Rigo tenía que ser sustituyíu al mancase nel so bracéu con Polo. El central díbase ovacionáu pola que yera la so afición hasta’l pasáu mes.

Mientres la primer parte, escasez d’ocasiones, sobremanera locales. Tol peligru llevábalu’l Ciares. La primera teníala Jimmy, al atopase un balón sueltu dientro de la área, pero la so volea a espetaperru díbase fora por pocu.

El Ciares llevó’l mieu a la grada nos últimos cinco minutos. Primero Fonso recibía un pase perfeutu de Juan Carlos y entraba na área pol perfil derechu, pero’l so centru de la muerte pasiábase por delantre de Chechu ensin atopar rematador.

La más clara yera p’Aitor Cañedo, que llograba cabeciar na frontera de la área pequeña, pero’l balón llambía’l llargueru. Nel siguiente córner, salvaben los locales baxu palos.

Al descansu, sensación de qu’el Ciares yera cimeru, nun sufría tras, y con un pocu de puntería llevaría’l partíu. Y asina asocedería. Ponte sustituyía a un Chery que volvía al so puestu d’estremu. Jimmy cayía a banda, y camudábase el dibuxu pa ponese con dos enriba.

Siguíen fuertes los visitantes. Apenes empezaba, Pablo Martínez remataba alto una dexada de Polo na frontera. Darréu, de nuevu Polo, yera baltáu na área cuando encaraba a Chechu. Nun paecía punible.

L’Entregu nun daba amueses de peligru. Namás San Eloy trataba de dar un pocu de sentíu al xuegu, pero abusaben del balón en llargu, con ventaya pa una defensa visitante que se sentía cómoda como pexe na agua.

Nel minutu veintiuno d’esta segunda parte, Chechu sal en falsu. Pablo Martínez remata, refuga la defensa. Ponte remata, y Polo remacha. Nuevu tantu del ariete avilesín, en plena racha de fútbol y goles.

D’ende a la fin, ansiedá de los locales ensin peligru, y traqnuilidad de los visitantes. Ponte intentó’l detalle, en controlando col pechu y rematando de chilena.

L’únicu disparu a palos de los del Nalón llegaría a la fin, paecía fora de xuegu, pero l’árbitru ordenó siguir y el disparu centráu atrapolu Davo.

Victoria contundente, non tantu pola resultancia como pol xuegu. Agora llega’l güesu, el Caudal. El sábadu La Cruz va esfrutar de la meyor plantiya de la categoría. Que nun falte naide.