[Ciares 0-2 Caudal] Casi un añu, tou un llogru
Dos goles nes acabadures del partíu dan la victoria a los de la Cuenca, nun partíu trabáu con poques ocasiones.
[youtube]https://www.youtube.com/watch?v=20zn5HBGY48[/youtube]
La Cruz vistíase de gala. Llegaba tou un clásicu, el Caudal de Mieres, y la meyor entrada de la temporada esperaba.
Ciares 0 – 2 Caudal
Ciares: Davo, Fonso, Lozano, Beni, Aitor, Juan Carlos, Jorge Vázquez (Cris Alonso 71′), Pablo Martínez, Jimmy, Bryan (Piñera 46′), Polo (Chery 76′)
Caudal: Guilermo, Pablo Gil, Jano, Saavedra, Noel Alonso, Samuel (David Álvarez 76′), Richard, Nacho, Óscar Pérez (Gerica 76′), Armando Invernón, Chus (David González 86′)
Goles:
0-1: Chus 83′
0-2: David Álvarez 92′
Árbitru: González Barrios, del Colexu d’Avilés. Amonestó a los foriatos Samuel y Jano.
Incidencies: 600 espectadores en La Cruz. Tarde soleyera y terrén de xuegu en perfectu estáu. Dambos equipos solidarizáronse colos mineros de Zarréu de primeres del alcuentru.
Álvaro Ponte sumábase a Priendes como baxa, por cuenta de un procesu gripal. Enfrente, muncha cara conocida, enforma futbolista habitual de categoríes cimeres. La xente estudiábalos, entrugaba por ellos. Per delantre tou un retu. Dende la victoria del yá sumíu Cuideiru en Marzu del añu pasáu, la Cruz nun viera cayer al so equipu en Lliga. El Caudal presentábase como dura torga pa caltener el récord. Vamos Ver.
Los primeros 25 minutos fueron apolmonantes pal Ciares. El Caudal nun yera capaz de superar el mediu del campu ante un equipu presionante ya intensu como’l local. Dambos llaterales desdoblábense con facilidá, y llegaben enriba.
La primer ocasión fabricábala Juan Carlos, al meter un pase perfeutu penriba a Jimmy que disparó al primer palu, pero refugaba Guillermo y mandaba a córner. La segunda clara yera un llanzamientu de Pablo Martínez de falta que llambía’l poste. Yeren los meyores minutos locales.
Veinticinco minutos tardó’l Caudal en llegar a la área contraria, y cuarenta y cuatro en crear peligru. Pero un maxistral Davo salvaba’l gol psicolóxicu enantes del descansu.
Primer parte pal Ciares, anque nel tramu final nun pudiera llevar escesivu peligru. Quedaba per delantre un llargu segundu autu.
Segunda parte, yá yeren los de Mieres los que mandaben. Ensin llevar peligru, pero’l balón yera so. El campu paecía bien llargu pa los teyeros, que nun algamaben la área caudalista.
Sicasí, los minutos pasaben y nun llegaben goles, nin ocasiones. Un clásicu del fútbol, Samuel, retirábase amonestáu pa dexar el so sitiu a un killer, David Álvarez. Más madera.
El Ceares trabayaba bien, nun dexando buecos. Magar costaba salir, a dambos equipos costábalos trabayu’l partíu. Los locales trabayando, los visitantes buscando ocasiones. La única clara diba tenela Chus, a falta de 15 minutos, cuando cabeciaba a espetaperru nel segundu palu y de nuevu Davo salvaba a los locales.
Cuando namás quedaben 7 minutos, un mal disparu visitante termina na cabeza d’un Chus que remacha solu. Posición dudosa y munches protestes. Colos brickers enriba, una nueva contra y David Álvarez llántase ante Davo y bátelu por baxu. Los puntos volaben pa Mieres.
A la fin aplausu unánime. El Ciares nunca se rinde. Raspien l’añu ensin perder na Cruz, pero los aficionaos raspien un añu esfrutando d’esti equipu. Entramos na recta final, onde se decide tou. Folgamos la fin de selmana y dempués camín de Noreña, otra plaza de les importantes. Ensin sufrimientu nun hai gloria.