El Pepe Ortiz quédase en casa

Tuvimos qu’esperar hasta l’añu 2015 pa ver al U.C. Ceares llevantar el so troféu veraniegu per primer vegada, y llogralo amás remontando, dando la vuelta a un marcador que se punxera en contra na primer parte.

Yera tamién la primer vegada en que yera un rival non asturianu’l qu’apostara’l Troféu. Rindía visita La Bañeza, devolviendo’l partíu vivíu’l branu pasáu en terrén lleonés. Naquella ocasión terminaba’l partíu n’empate.

Na primer parte yeren los visitantes cimeros. A pesar d’empezar fuertes los coloraos, el partíu foise trabando y eso aprovechábalo La Bañeza. Un golazu de falta con pierna esquierda abría’l marcador, nada podía facer Davo ante’l llanzamientu.

A partir d’ende volvíase sópitu l’alcuentru. Primeru enfrentamientu na banda de tribuna. Nel segundu enfrentamientu, en banda contraria, l’árbitru espulsaba a Marcos Iglesias por locales y a David polos visitantes, nun sabiendo aselar los ánimos nun partíu amistosu. Per delantre, nada menos que 55 minutos con 10 xugadores.

Na segunda parte foi meyor el Ceares. Apenes empezaba, gran xugada del debutante Naves pola esquierda, centro sobre la llínea de fondu, y Aitor Cañedo, que llegara a zona de finalización, nun pudo definir.

Poco dempués, Ponte dexaba la portería taramellando con un remate a espetaperru que s’estrellaba nel llargueru.

L’empate, na siguiente xugada. Penalti un tanto innecesariu sobre otru debutante, César, qu’él mesmu tresformaba. Y casi de siguío, el gol de la victoria. Chery cruciaba’l campu n’horizontal nuna gran xugada, abría pa Raúl en banda derecha. L’estremu diestru ponía’l centru con rosca y Ponte marcaba.

Agora toca Avilés, el miércoles a les 19:15 debutamos en Copa Federación. A escribir nuevos capítulos.