Conceyu y propuestes pal utillaxe
El pasáu día 30 d’agostu celebróse’l conceyu ordinariu correspondiente a la temporada 14/15, que trescurrió ensin demasiaes novedaes.
L’orde del día centrábase nos puntos fundamentales correspondientes al Conceyu Ordinariu, que son principalmente económicos, onde s’aprobaron les cuentes correspondientes a la temporada 14/15 ensin votos en contra, a pesar de los cerca de 4000€ de déficit motivaos por impagos de patrocinadores y sobrecostos del caltenimientu de La Cruz.
En cuanto al presupuestu pa la temporada 15/16, tamién foi aprobáu ensin votos en contra, anque nel alderique previu puntualizóse la necesidá de mayor actividá na busca de patrocinadores tantu por parte la directiva como de la masa social, pa intentar llegar de la manera más folgada posible a final de temporada.
Pasábase entós a los socesivos informes deportivos, que concluyeron cola presentación del documentu sobre la Escuela Mista de Fútbol, qu’esclaria’l funcionamientu y los criterios de la mesma y estena duldes que nel pasáu dieron orixe a conflictu. Esti documentu, va tar disponible llueu de forma pública.
Nel informe social repasóse de volao l’estáu de los grupos de trabayu, una y bones esta parte tratóse de manera bien amplia na asamblea estraordinaria del 9 de xunetu.
Quedaba pendiente namás que la tema del utillaxe, nel que’l conceyu votó por estremar les xeres pa non sobrecargar de trabayu a una sola persona y dexar que faiga los sos llabores de forma más desafogada, así como dar potestá a la directiva pa escoyer a los voluntarios ente los que se presenten pa esos puestos. Va abrise agora un plazu d’unos díes, hasta esti domingu, por que quien lo deseye pueda ufiertase como voluntariu, en función de la descripción de los puestos presente nesti documentu. Pa proponese basta con comunicalo a cualesquier integrante de la xunta directiva.
Como siempres, animamos a les nueses socies a asistir al próximu conceyu yá que ye ehí onde se tomen les decisiones y onde se constrúi’l club.