[Llugones 2-2 Ciares] Xueves de crucifixión
Enésimu infausto tiempu añedíu pal Ciares, que de nuevu ve como se-y escapen puntos cuando amorrenta’l partíu.
[youtube]https://www.youtube.com/watch?v=UY_mVeEfbYY[/youtube]
Les mancadures y les sanciones condicionaben l’alliniación. Al respeutu de los que recibíen a l’Urraca el pasáu sábadu namás dos cambeos: Bryan sustituyía a un mancáu Pablo Martínez, y Polo yera de la partida en sustitución de Ponte. Los demás, los que quedaben disponibles.
Empezaba fuerte’l Llugones. Muncho más caltriante que los brickers. Ello ye que yá al primer cuartu d’hora adelantrábense. Juan Sánchez controlaba con un balón llargu con muncha calidá, y definía ante Kike.
Llugones 2 – 2 Ciares
Llugones:Raúl Paulino; Miguel, Duque, Dioni, Raúl; Pablo Prieto, Álvaro; Damián, Wilmer (Ariel 65′), Alberto (Chamorro 73′); Juan Sánchez
Ciares: Kike; Fonso, Lozano, Beni, Chery; Aitor; Bryan, Jimmy, Juan Carlos, Cris (Ponte 73′); Polo (Berto 84′)
Goles:
1-0: Juan Sánchez 15′
1-1: Jimmy 52′
1-2: Jimmy 81′
2-2: Ariel 93′
Árbitru: Nieto Martínez, auxiliáu por Granda García y Barriga Morente, de la delegación d’Avilés. Tarxetes marielles a los llocales Alberto, Miguel, Raúl, Roni y Dioni y a los visitantes Lozano, Fonso, Jimmy, Chery y Ponte. Tarxetes colloráes a Dioni (70′) y a Miguelín, técnicu visitante (93′)
Incidencies: Santa Bárbara, con terren de xuegu sintéticu. Mañana soleada. 150 espectadores, bona parte d’ellos siguidores del U.C. Ceares.
El mesmu Kike, porteru visitante, amosábase entonáu na mañanera del Xueves Santu. Intervenciones de méritu, y erros na definición local, calteníen vivos a los brickers.
La primer clara foi pa Jimmy. Controlaba un gran centru con pierna maniega de Juan Carlos, pero Paulino tapaba’l disparu. Soltábense los visitantes. Empezaben a llegar, empezaben a apoderar, empezaben a asustar.
La segunda parte sirviose con tou tipu de mueyos. Nengunu de los dos equipos fadría cambeos al descansu. Siguíen los mesmos 22. 10 con camiseta de rayes, 10 con camiseta colorada, y los dos porteros con esactamente’l mesmu tonu de verde.
Kike volvía llucise al empezar la segunda parte, volando hasta la escuadra esquierda de la so portería y unviando a córner. Yera l’últimu cartuchu del Llugones, llegaba’l momentu Ceares.
Díbase Bryan per banda derecha. Ponía un gran centru, y Jimmy, de mano, con serenidá, con clase, empataba. Jimmy ta en racha.
Yera l’empiezu del monólogu cearista. El porteru salvador pasó a ser Paulino. Inclusive cuando, nel minutu 68, quedaba con 10 por espulsión de Dioni en garrando a un Polo qu’encaraba al porteru.
El gol aguantábase, pero de nuevu Jimmy apaecía. Esta vegada pa unviar cola so superficie favorita, l’esterior, al fondu les malles, tres disparu refugáu de Ponte. D’ende a la fin, guión hitchcockniano. Paulino xubiendo a rematar los córners. Kike estenando ente 20 xugadores más. Bryan qu’entá nun sale del so plasmu ante la falta señalada cuando nun tenía nin porteru rival delantre. Paulino que de nuevu xube. Refugue y gol del Llugones.
De película de terror. O peor.