[Praviano 2-2 Ciares] Un puntu más importante de lo que paez
El Ciares arrancó un empate sufríu en Santa Catalina ente’l Praviano y continúa metíu de llenu na llucha pola Copa Federación.
Puntu mportante l’arrancáu pol Ciares na visita a Pravia, que-y permite igualar a puntos colos principales rivales, Tinéu y Covadonga, na llucha por disputar la Copa Federación per tercer añu consecutivu. De los tres equipos implicaos, sólo dos van poder disputar el Troféu.
Pravianu 2 – 2 Ciares
Pravianu: Raúl; Chechu, Fran, Juanma, Bertín; Dani, Balsera; Aitor, Manu (Efrén 80′), Iván y Morán (Eric 66′)
Ciares: Davo; Dani Hevia, Aitor, Miguel (Juan Carlos 70′), Chery (Natan 75′); César (Ponte 80′), Pablo Martínez; Fonso, Jimmy, Cris Alonso y Marcos Iglesias
Goles:
0-1: Marcos Iglesias 12′
1-1: Manu 30′
2-1: Fran (p) 35′
2-2: Cris 86′
Árbitru: Marinero Noval (Uviéu). Amonestó pol Pravianu a Balsera y pol Ciares a Pablo Martínez.
Incidencies: Alcuentru correspondiente a la vixésimu novena xornada del grupu II de Tercera División celebráu nel prau de Santa Catalina ente unos cuatrocientos espectadores. Césped en mui buen estáu. Guardóse un minutu de silenciu en memoria de les víctimes del atentáu terrorista de Bruseles y de Johan Cruyff.
Modificaba el 11 titular Iñaki Eraña en Santa Catalina. Pablo Martínez sustituyía a Juan Carlos nel centru’l campu, y en llínia de tres cuartos, Dani Hevia, Jimmy y Cris Alonso, preparaos pa facer de les de so.
L’once del Ciares yera especialmente combinativu de mediu prau palantre, y el Pravianu decidió ceder el balón al equipu güei celestes. Asína Marcos Iglesias, al poco d’entamar, batía perriba al porteru y adelantaba a los teyeros.
En dos xugaes daba-y la vuelta’l Pravianu al marcador. Na primera, xugada pela so banda izquierda, pase a la frontal y disparu axustáu. A los dos minutos, penalti por mano de Miguel y el segundu gol subía al marcador.
Hasta ehína les ocasiones del Pravianu, que nun volvió a crear peligru. A partir d’entóncenes el xuegu y el fútbol foi ciarista, que buscó l’empate con enfotu. Aitor Cañedo y Miguel adelantaron la posición unos metros, colos llocales mui metíoos atrás encerraos na so parte del prau.
Cris, el meyor xugador del partíu, buscó entrar una y otra vez pela so banda, col centru’l prau combinando ente ellos pa llueu buscalu constantemente. Nuna d’eses, Chery doblaba a Cris y el so centru atopaba a Jimmy, pero’l remate salía mui centráu.
De nuevu’l capitán ciarista yera protagonista, cuando cazaba un despexe del porteru llocal y dexaba de cara pa Fonso Bellón, pero’l so remate refugábalu la defensa.
Quién si non, Jimmy, de nuevu. Robaba un balón a la defensa praviana, plantábase ente’l porteru pero’l disparu marchaba altu.
Turnu pa Cris Alonso. Gran xugada con él y Marcos Iglesias como protagonistes. Quéda-y el balón nel puntu de penalti al hábil estremu xixonés pero’l disparu-y marcha fuera.
Yá al final llegaba l’empate. Centru dende la derecha de Natan. Controla Cris, tira dos amagos y axusta al palu.
Col Ciares volcáu buscando la victoria, una pérdida de balón tuvo a piques de costa-y un paru cardíacu a Davo, pero’l colexáu decretaba fuera de xuegu cuando dos xugadores llocales lu encaraben.
La última, de nuevu, con Jimmy y Cris como protagonistes, cuando’l balón botaba-y mal a Cris dempués d’un pase del capitán que lu tenía dexáu solu frente al porteru.
Al final, empate. El Ciares sigue inmersu nuna dura batalla, y el Pravianu non menos, al superar solo en cuatro puntos los puestos que forzaríen a un descensu a preferente, cola sombra d’un Sporting B nel filu la navaya. Agora descansu y el Tinéu en La Cruz. Partíu capital na llucha por disputar la “Copa los probes”.