Skip to main content

[Ciares 1-2 Colunga] Del charcu a la llona

Un momento del choque entre el Ceares y el Colunga de este domingo | Foto Chus Monteserín

El Ciares pierde en casa, nun alcuentru nel qu’ambos equipos apostaron pola victoria. Con empate, un charcu frenó’l gol de Marcos.

Un momentu del choque ente'l Ciares y el Colunga d'esti domingu | Semeya Chus Monteserín
Un momentu del choque ente’l Ciares y el Colunga d’esti domingu | Semeya Chus Monteserín

Una selmana más, como vien siendo vezu en La Cruz, l’agua nun daba tregua al maltrechu prau, pero una vegada más, nun yera torga pa la rempuesta del públicu, que brindaba una buena entrada.

Ciares 1 – 2 Colunga

Ciares: Davo, Fonso, Miguel, Aitor, Chery, César, Juan Carlos, Natan, Chus Naves (Dani Girón 60′), Ponte (Pablo Martínez 46′), Marcos Iglesias

Colunga: Dani, Castilla, Makali, Busta, Marcos, Sergio (Miguel 88′), Zucu, Juan (Luis 73′), Jorge, Abraham, Viti (Naya 68′)

Goles:
1-0: Marcos Iglesias 12′
1-1: Abraham 53′
1-2: Zucu 80′

Árbitru: Peláez Fernández, del Colexu del Nalón. Amonestó a Marcos Iglesias y a Chus Naves pol Ciares, y a Makali, Busta y Sergio pol Colunga.

Incidencies: Minutu de silencio, pol mozu xugador avilesín fallecíu la selmana pasada.. 300 espectadores en La Cruz. Terrenu de xuegu blandu.

Cola vuelta de César, él y Juan Carlos recuperaben la so posición avezada en detrimentu de Pablo Martínez y de Dani Girón, titulares en Llanes. Tamién Cris yera baxa, y Chus Naves ocupaba l’estremu zurdu. Miguel entraba como central diestru.

Arrancaba frenéticu’l partíu. A la tercer internada de Natan, yera claramente derribáu dientro l’área. Marcos llanzaba abaxu, pegadina al palu, y subía’l primeru al marcador. Poníense les coses de cara cuando sólo teníen pasáu 10 minutos.

Paecía meyor asentáu’l Ciares, con un Colunga buscando muncho más les contres. Sin munchas ocasiones clares, tal vez la meyor foi, curiosamente, pa los visitantes. Pero Davo salía rápidu y despexaba’l disparu.

Natan y Chus Naves llevaben peligru a la zaga visitante. Natan pegába-y mal al balón cuando lo tenía too a favor pa dar asistencia de gol dende’l francu derechu. Chus, pela so parte, revolvíase mui bien na so banda y sacaba un centru peligrosu que despexaba con apuros el porteru visitante, y posteriormente intentaba’l remate de cabeza pero salía-y centráu.

La primer parte daba la impresión de divertida, con llegaes pa los dos equipos, si bien les ocasiones nun yeren del too reseñables. De toles maneres, rapidez nes transiciones y xuegu vistosu pa los aficionaos.

Sicasí, nos segundos 45, el Colunga salía decidíu a buscar puntos. Así ye que sólo teníen pasáu 8 minutos cuando Abraham enganchaba un gran disparu dende’l costáu zurdu del área y batía pelo alto a Davo. L’estremu zurdu volvía lloca a la defensa durante tola segunda metá.

El fútbol paecía más trabáu, con peor prau, ya que l’agua nun abocanaba. La primera clara teníala Aitor Cañedo. Adelantábase a la defensa y remataba de cabeza nel primer palu pero-y marchaba per arriba. Tamién lo intentaba Pablo Martínez, pero’l so duru disparu colaba raspiando’l llargueru.

L’anécdota yera pa Marcos Iglesias. Recibía un gran pase de Juan Carlos en profundidá, plantábase ente’l porteru y lu batía per baxo. Batíalu per un instante. El que tardó la xente en dase cuenta de que‘l charcu de la portería había frenáu el remate y había quedáu sobre la llínia.

Cuando ya se cumpliera’l minutu 80, error na salida del balón del Ciares. Miguel recibía un saque de banda, pero dába-yla a Naya. El delanteru avilesín llanzaba un duru llatigazu cola zurda, que repelía la escuadra. Zucu remachaba’l rechace y adelantaba a los visitantes.

Derrota dura, nun partíu nel que los llocales compitieron, pero perdonaron. Y los detalles, más que nunca, marcaben l’alcuentru. Del charcu a la llona.

0
    0
    Carrito
    Tu carrito está vacíoVolver a la tienda