Préstanos qu’el fútbol seya de toxs.

El pasáu vienres organizamos, xuntu coles nuestres compañeres del Xixón Fútbol Femenín, una mesa redonda na que pretendíemos axuntar diferentes esperiencies personales en tornu a la situación tantu del fútbol como del rugby femeninos.

Y ye que los retos a los que s’enfrenten les deportistes nestes disciplines son tovía mayores que los qu’enfrenten, yá de por sí complicaos, n’otros deportes onde nun existe un estigma en cuantu a la so práctica por parte de les muyeres.

Si yá existe una marcada discriminación económica, mediática y social, que caltién al deporte femenín en condiciones precaries con respectu al so equivalente masculín en casi toles discliplines, estes circunstancies alcancen la so máxima espresión nel casu del fútbol, onde mientres que nel fútbol profesional masculín muévense cantidaes estratosfériques, nel casu del fútbol femenín d’élite malpenes hai xugadores que puedan simplemente llegar al salariu mínimu interprofesional, y la mayoría tienen inclusu que costiar los gastos de la temporada.

Nel casu del Rugby, los prexuicios, y sobre tou la falta d’apoyos, faen que seya mui difícil construyir equipos femeninos y por tantu dir desarrollando les categoríes necesaries a nivel autonómicu pa que les moces nun tengan qu’esperar a edá senior pa poder competir, dalgo que nos va desplicar Silvia del Xixón Rugby Club con munchu detalle.

Xuntu a ella, Mª Amor, actual tesorera del Gijón Fútbol Femeníno y expresidenta, Belén, vicepresidenta del Femiastur Avilés, club que consiguió desarrollar una importante cantera de xugadores, y Sara, aficionada del U.C. Ceares, aportaron la so esperiencia sobre diferentes aspectos qu’envuelven a les muyeres en deportes “d’homes” que Llucía, ciarista que puso la elástica de moderadora, diba proponiendo.

Esperamos que vos preste.