[Llugones 0-0 Ciares] A cero puru

Cuartu partíu consecutivu nel que’l Ciares nun ve puerta, pese a ser superior a un ordenáu Atléticu de Llugones.

[youtube]https://www.youtube.com/watch?v=hidOVG2XBUw[/youtube]

Sólu pequeños cambios nel 11 inicial que presentaba Iñaki Eraña pa llevar la victoria del Campu de Santa Bárbara. Tres de la so sanción por 5 cartulines volvía Marcos Iglesias al 11, y Jimmy yera titular por primer vez esta temporada sustituyendo a Pablo Martínez. Ente los principales atractivos, l’ex ciarista Bryan nel estremu diestru llocal.

Dende’l primer momentu quedó bien a les clares quién quería llevar el pesu del alcuentru. El Ieares garró’l güe prlos cuernos, mientres que’l Llugones prefirió pertrechase nel so propiu campu buscando la contra.

Continua posesión de balón visitante, que sin embargu nun terminaba d’atopar la portería llocal, con xugaes que morríen na frontal del área o en centros ensín remate. Por exemplu nuna gran salida del equipu, con apertura de Marcos pa Fonso, que ponía un gran centru pero al propio Marcos llegaba-y unos centímetros altu’l balón y nun podía precisar el remate.

Aitor llanzaba una falta dende la frontal con pinta de gol, pero rebotaba na barrera y diba a córner. Precisamente d’un córner llegaba la más clara. Saque en cortu, centru cerráu y Juan Carlos remataba de cabeza a bocaxarru, pero rechazaba’l porteru. Decretaba fuera de xuegu nel rechace el Colexáu del alcuentru.

Sin embargu, el Llugones, que nun consiguiera poner n’aprietos a Davo durante tola primer metá, a puntu tuvo de repetir el gol nuna contra nel mesmu minutu en que lo conseguía’l Llangréu la pasada selmana, en claru casu de Déjà vu. Llegába-y el balón al estremu izquierdu Juan Steven, que se plantaba ente Davo, que resolvía bien.

Tres del descansu nun cambiaba’l panorama. Al Llugones paecía tener abondu col empate, y el Ciares dominaba’l balón pero nun yera a obtener clares ocasiones de gol. La más clara foi pa César, al que-y cayó l’esféricu dientro l’área y disparó tres bote, pero bloquiaba’l porteru.

La polémica llegaba yá avanzada esta metá. Cuando Marcos recibía una dura entrada nel mediu campu. El balón terminaba cayendo-y a un Chus Naves en posición clara, pero l’árbitru nun dexaba la llei de la ventaya y señalaba la falta.

El Llugones dexó pasar los minutos, sin priesa por buscar el gol. Y eso que na segunda parte merodeó más pel área defendía por Davo. Así que’l partíu llegaba al final col mesmu resultáu col qu’arrancaba.

Cuartu partíu ensín ganar, y cuartu partíu nel que los coloraos nun marquen gol. El próximu partíu además contra l’actual campeón, el Condal, que nun lo va poner nada fácil pa romper la racha. L’alcuentru dispútase n’horariu pocu habitual, ente selmana, colo que munchos aficionaos nun van poder presenciar un de los partíos siempre más atractivos. Toca ver puerta.