Previa U.C. Ceares – Real Avilés B

Sigue l’apinau calendariu pa los nuesos. Nesta ocasión ye un filial el que nos visita, el Avilés B.

L’equipu filial destaca pol so bon xuegu y el bon tratu al balón. Ello ye que yá anotó 15 goles no que va de lliga. Nel so debe figura que tamién encaxa munchos goles, 10. Na clasificación atópase nel puestu 5º con 16 puntos, igualáu con U.P. Langréu y Praviano, terceru y cuartu respectivamente. El so rendimientu como visitante cai sensiblemente, yá que en 4 partíos que xugo a casa, namás consiguió ganar unu, y yá perdió dos d’ellos. Esto vien provocáu pola so simplería, de la que s’aprovechen equipos yá más veteranos na Tercer División. Sicasí, la so trayectoria como local ye impecable, 4 partíos y 4 victories. Destaca Cristian, unu de los pichichis de la categoría, que vien amás de consiguir un hat trick na victoria por 4-3 ante l’Urraca. Ensin dulda ta llamando yá a les puertes del primer equipu avilesín. Llama poderosamente l’atención la igualdá d’esta temporada na categoría, onde por casu el Ceares, segundu, namás saca 5 puntos al undécimu clasificáu, el Condal. Ye por ello que cada partíu hai que xugalu como si d’una final tratárase. Tamos viviendo’l suañu d’acabar xornada tres xornada en puestu de play-off, y la mínima pinchada sacaríanos d’ende. Esperemos que nun se repita la resultancia de pretemporada, nel que perdimos por 1-0 tres, qué tanto, un penalti por mano. Sicasí aquel partíu dexó sensaciones positives, llevando’l pesu del partíu y creando les úniques ocasiones. El domingu volvemos a la llucha.