[U.C. Ceares 2 – 1 Avilés B] Tercera consecutiva y colíderes

Tercer victoria consecutiva, esta vegada por 2-1, ante’l Real Avilés ‘B’, una de les revelaciones del campeonatu. A pesar del bon xuegu del filial avilesín, los goles de Borja Noval y Pelayo Torre paecíen emponer escontra una victoria aparentemente sele, pero’l postreru tantu visitante acabó faciendo sufrir a la enchida ciarista. Siguimos batiendo récords y asitiamos colíderes, empataos a puntos cola Llealtá que nos supera por golaverage.

Ambientazo en La Cruz pa recibir al quintu clasificáu, el Real Avilés ‘B’. Unos 500 aficionaos, más de mediu centenar veníos dende la Villa del Adelantráu, que volvieron asitiar a La Cruz na cabeza d’asistencia a los campos de la Tercer División.

El partíu empezaba cola tónica habitual, col Ceares moviendo bien el balón y tratando de monopolizar la posesión hasta qu’apaeciera dalgún buecu na defensa visitante. Sicasí la primer ocasión foi pal Avilés, con un intentu del rapídismo delanteru Cristian que disparó alto. Poco dempués, nun balón a la área, paez que nel bracéu ente Ponte y Borja, l’esféricu cute na mano del defensa avilesín, pero l’árbitru manda siguir. La ocasión más clara vendría al cuartu d’hora de xuegu: Borja Argüelles dexa de cabeza pa Jimmy dientro de la área, el capitán intelixentemente desábrrese de la xugada por tar en fora de xuegu posicional, l’árbitru con bon criteriu dexa siguir la combinación, llegando’l balón a Pichón quien casi na área pequena dispara altu ante la salida del porteru. Nel minutu ’20, falta llateral na banda derecha, Óscar Ruiz cute con muncha rosca y Borja Noval qu’entra con tou al primer palu adelantrándose al porteru Jairo y poniendo el 1-0 . D’ende al descansu’l Ceares siguió apoderando’l xuegu, el filial intentaba sacar el balón xugáu y conectar con Cristian, pero apenes podíen superar la presión ciarista.

Tres el descansu’l partíu siguió’l mesmu cursu. Nel ’52 Ponte remataba de cabeza un saque d’esquina, pero Jairo unviaba a córner. El Real Avilés ‘B’ siguía intentando construyir xuegu dende tras, con un Ceares que buscaba tener el balón pero agora enfocándolo más escontra’l contraataque. Nel ’65 precisamente produzse un contraataque, y tres delles combinaciones el balón va parar a Pelayo Torre dientro de la área, el delanteru xixonés con tola tranquilidá del mundu regatia al so par, vuelve retaya-y triando’l balón, y cuando paecía que s’entretuviera por demás, cruciar pa roblar el 2-0. Gol de bandera y fiesta nes graes qu’a puntu tuvo de multiplicase: poco dempués nuevu contraataque lleváu por Pichón y Meana, el mozu mediocentro garrasti a la derecha para Ponte, quien dispara cruciáu y Jairo salva milagrosamente, el refugue cai-y a Argüelles qu’en posición bien forzada xuntu al palu unvia a la cruceta y acaba cutiéndose cola valla y precisando asistencia. Nel minutu ’78 Pablo Martínez sustitúi a Ponte. Nel ’81, Lozano pierde un balón nuna xugada ensin peligru, Cristian escápase en velocidá, llántase delantre de Kike, y bátelu con un disparu bien afechu. 2-1 y diez minutos de sufrimientu per delantre. El filial intentolo con balones a la área, pero Kike bien seguru facíase con ellos. Aitor Cañedo entró nel ’87 por Pichón pa contener esos balones. L’árbitru decretó 5 minutos d’agregu pol golpe de Borja Argüelles, y pese al nerviosismu nes graes, el 2-1 nun se movió del marcador.

Nueva victoria que nos dexa na segunda posición, colíderes xuntu al Lealtad que nos supera en golaverage. L’equipu vuelve dar amueses de que nun tamos ante una racha, nin ante un golpe de suerte, si non qu’estes resultancies son frutu del trabayu y l’esfuerzu de la plantiya. Con 20 puntos l’oxetivu de la permanencia cada vez ta más cerca, de manera que vamos poder encarar con mayor tranquilidá los difíciles meses d’iviernu.

Próximu partíu: Domingo a les 15:45 en San Pedro, Andés C.F. – O.C. Ceares. Entraes pa socios ciaristas 8€ (imprescindible apuntase nel teléfonu del club, watsapp o llamada: 618 149 800).