Primer taramiellu de la temporada

Los de Nacho Cabo asaltaben el lideralgu en Les Caleyes, y a puntu tuvieron de puntuar ante’l líder. Primer y tercer clasificáu enfrentaronse en Villaviciosa, resultando, posiblemente, unu de los partíos más guapos de lo que va de temporada. Finalmente el Lealtad impúsose por 2-1 con un gol de penalti nos últimos minutos. Más d’un centenar de siguidores ciaristas nes graes, creando un ambiente de luxu a base de cantaraes y animación.

El partíu empezó con un claru dominiu local. Lombán, bien participativu, entraba enforma en xuegu y el conxuntu maliayo vivía en campu ciarista. Nel minutu 8 Edu incorpórase bien per banda esquierda y pon un centru a la área qu’el mesmu Lombán remata de cabeza sin oposición. 1-0 y l’ofensiva del líder que nun cesaba, de cutio llegando a la área visitante anque ensin poder rematar. Nel minutu 20 llegaba la primera del Ceares: pase en fondura escontra Ponte tres una bona combinación, el delanteru llántase solu ante’l porteru, pero’l mano a mano va salvalu perbién Loic, titular ante la baxa de Javi Porrón. Hasta’l descansu engarra por facese col dominiu del xuegu y delles llegaes ensin mayor trescendencia.

El guión camudó na segunda metá. El Ceares saltó al terrén de xuegu dispuestu a la remontada, faciéndose col balón y calteniéndose en campu local. Pablo Martínez sustituyía a Juan Carlos, y pocu dempués, nel 55′, entraba Fran Do Santos por Borja Argüelles.

Nel 57′ Pichón repite la xugada de Ponte na primer parte y llántase delantre de Loic; el porteru vuelve salvar los muebles, pero nel refugue cometi falta sobre Ponte. Pablo Martínez llanza’l llibre directu percima de la barrera y esta vegada Loic nun puede evitar un gol de bandera. 1-1, tou empezaba de nuevu con media hora per delantre. Non solo igualárase el marcador, el xuegu tamién taba bien apostáu, por momentos paecía que camudaren tornar y agora yera’l Ceares quien podía llevara los trés puntos, anque l’empate paecía’l destín del alcuentru. Nel 79′ Rigo entraba por Ponte, y pocu dempués producíase la xugada desgraciada del partíu: balón sueltu dientro de la área, Lozano nel so intentu de control toca’l balón cola mano. Penalty tan inocente como indiscutible. Robi cueye carrera y engaña a Kike, poniendo’l 2-1. D’ende a la fin el Ceares entornóse sobre la meta maliaya, xenerando xuego pero con escasa fortuna. Yá en tiempu de descuentu, una clara mano na área de la Llealtá punxo’l silenciu en Les Caleyes, pero nin la llínea nin l’árbitru decidieron sancionala, provocando protestes nunes graes llaraes de ciaristas.

Final, 2-1, l’afición estimando l’esfuerzu a el xugadores, y el xugadores faciendo lo propio col más d’un centenar de siguidores xixoneses que se dieron cita en Les Caleyes. Bon partíu de fútbol, con momentos de bien bon xuegu, y sensación de poder sacar daqué más. Primer tropiezu de la temporada, ante’l líder, pero que nun fai más qu’alimentar la bona imaxe que ta dexando l’equipu no que sigue siendo la meyor temporada del club na so hestoria.

Próximu partíu: Domingo 17:00 en La Cruz, U.C. Ceares – Condal C.F.