[Resumen Avientu] 2016 fora del descensu

Gijón F. F. once inicial ante el Femiastur

Última selmana intensa de competición nesti mes d’avientu, que permite a les teyeres dexar l’añu fuera de los puestos de descensu.

Xixón F. F. once inicial ente'l Femiastur — Once inicial del partíu de Miranda | Semeya Menchu Vigil

Por caprichos del calendariu de Segunda División, el femenín tenía en prácticamente una selmana nueve puntos en xuegu ente tres rivales dures, pero cola urxencia de sacar dalgo positivu qu’espeyara na clasificación la meyoría del equipu.

Como ya comentemos en la crónica, el partíu nos campos de Roces ente’l Friol foi un derroche de solidez y contundencia defensiva, que llego a desesperar a les lucenses a les que, pese al so dominiu posicional, sobráron-yos los deos d’una mano pa contar les ocasiones. Un puntu que ponía de manifiestu que trabayando bien, nun hai equipu al que nun se-y pueda arrancar dalgo positivu.

Llegaba a continuación, el xueves, el desplazamientu a Miranda (al ser fiesta la sede avezada nun taba disponible) pa medise a un Femiastur na zona más o menos tranquila de la tabla, con un colchón de 6 puntos sobre’l descensu. Hai veces que partíos tremendamente igualaos terminen con un resultáu d’esos que podemos dicir engañosu. D’esti puede decise que tuvo dos partes así, con una primera na que dambos conxuntos tuvieron ocasiones clares, y qu’acabó con un 2-0 a favor de les llocales, y un segundu tamién mui disputáu, qu’acabó con 0-2 pa les visitantes, que pudieron culminar la remontada nos minutos finales pero los sos intentos nun acabaron por materializase. Al final empate que puede considerase xustu y confirmación de que l’equipo alcontró’l so estilu de xuegu. Tocaba recuperar pa’l siguiente partíu, en tres díes, que diba abrir la segunda vuelta antes del parón navidiegu.

Turnu pa’l Atlántida de Matamá. A pesar de lo similar del resultáu, poco tuvo que ver esti partíu col de la primer vuelta. Si nel primer partíu de lliga l’Atlántida nun dio nengún tipu dmopción y solucionó’l partíu n’apenes 20 minutos, nesti casu nuevamente’l buen trabayu defensivu del equipu a sabiendes de xugar con un rival superior, fizo que nun fuera hasta la entrada de Paula Tabares, dinamitando’l partíu con un hat trick nos últimos minutos del alcuentru, los tres puntos volaran al sacu de les pontevedrenses.

Dos puntos de nueve que, viendo la entidá de les rivales, danse por buenos, máxime cuando marquen una llínia ascendente clara del equipu.

Agora toca parón hasta’l 8 de xineru, cuando vamos recibir en casa al Tordoia nun duelo directu pola permanencia. Mientres tantu vamos dormir más tranquiles fuera de los puestos de descensu.

¡PUXA XIXÓN!