[Xornada 26ª] Cronica en colloráu y azul

Xornada desemeyada pa los equipos de play-off. Mientres Pravianu, Ciares y Llealtá ganaben los sos compromisos; Llangréu y Condal perdíen ante rivales directos y complícábense la temporada.

Cola victoria del Ciares nel Alejandro Ortea, el Condal baxa hasta la sesta posición, algamáu yá pol Cuadonga, y con visita’l domingu a Ganzábal nun partíu que quién sabe si podrá esanicialu definitivamente de la llucha pol play-off. Un partíu que va ser bien importante tamién pal Llangréu, que con cuatro ganes en cinco partíos paez empeñáu en complicase la vida. Curioso que cuando’l Ciares visitaba Ganzábal, los locales superaben en cuatro punto a los teyeros, y anguaño atópense 3 puntos por detrás, más el gol average.

Otru equipu que pudo perder munches de les sos opciones esta xornada ye l’Universidá d’Uviéu. Recibíen al Pravianu cola posibilidá de caltenese na engarradiella, pero una doliosa derrota déxalos yá a 9 puntos del Llangréu.

Ente los aspirantes, sigue fuerte’l Cuadonga, yá a un solu partíu del Llangréu, y súmase el Cuideiru a la fiesta. Equipu que a pesar de los problemes internos, lleguen somorguiaos nuna increíble racha de resultancies.

Pembaxo, victoria ente discutiniu pal Andés sobre’l L.lenizu, que-yos da aire y enfotu pa encarar el postreru terciu de lliga con posibilidaes de salvación. Mientres siguen los problemes pa Candás, L.lenizu y Xixón Industrial, amontaos esta selmana por una nuevu derrota del Caudal.

Trés partíos destaquen esta próxima xornada sobre toos. Na llucha penriba, el Cuadonga recibe a la Llealtá, y el Llangréu al Condal. Tensión especial nel segundu d’ellos, con dos equipos que precisen la victoria tantu moral como deportivamente. Pembaxo, el L.luarca – Andés probablemente va marcar el destín d’unu de los dos equipos, y quién sabe si de los dos.

Queden 12 xornaes más. Casi nada.