[Condal 0-1 Ciares] Ensin facer prisioneros
Prometía fiesta pal Ciares. Bon tiempu, descuentu nes entraes pa socios teyeros, fiesta previa nun chigre local, y dos equipos que nun se baxaron en tola temporada de los puestos altos.
La baxa obligada por sanción de Fonso Bellón cubríala Rigo, Borja Noval repitía nel llateral maniegu, pero yera Aitor Cañedo quien ocupaba’l puestu de central. Penriba, la novedá yera Meana, xugando en banda derecha, en sustitución de Fran Dos Santos.
Condal 0 – 1 Ciares
Condal: Lastra, Peña, Adolfol, Óscar, Mori, Rueda; Nijo (Cris Alonso 62′), Carlos (Víctor 82′), Marcos Iglesias Javi Álvarez, Javi Álvarez (Yerai 70′) y Aitor Hervás
Ciares: Pablo Díez, Rigo, Lozano, Aiotr, Borja Noval, Pichón, Pablo Martínez, Meana (Rubo 64′), Jimmy, Pelayo Torre y Borja Argüelles
Goles: 0-1: Pichón 5′
Árbitru: Granda Barros (Avilés). Amonestó pol Condal a Carlos, Rueda, Adolfo, Óscar, Mori y Yerai y pol Ciares a Rigo.
Incidencias: Alcuentru correspondiente a la vigésimo sexta xornada de Tercera División n’Asturies celebrada nel Alejandro Ortea ante cuatrocientos espectadores, un centenar del Ciares. Terren de xuegu demasiao altu y lentu.
Apenes empezara’l partíu, l’ex cearista Nijo ponía un centru dende banda derecha, Marcos Iglesias remató de cabeza na área pequena pero salvó Pablo los muebles. Plasmu pal ensame ciarista.
Na siguiente xugada, falta sobre Borja Argüelles. Pega-y Aitor Cañedo a pierna camudada, toca Pichón nel segundu palu y el balón cólase na portería local en tocando nun defensa. Namás 5 minutos de partíu y el Ceares adelantrábase.
Prometía fiesta pal Ceares.
La primer parte nun destacó pol bon xuegu. El Condal trataba de tener el balón, pero ensin xuegu ye bien difícil faer dañu a los de Nacho Cabo. El Ciares pela so parte buscaba les contres, pero fallába-yos l’últimu pase.
Partíu de cero cero.
Namás Nijo intentaba coses, pero con escasa suerte. Una falta que forzaba na frontera del área llanzábala él mesmu, pero estrellábase na barrera.
Y los minutos pasaben.
Y prometía fiesta pal Ciares.
El Condal trataba d’adelantrar llínees na segunda metá. Hervás y Nijo pegáronse más a les bandes, tratando de facer dañu a la segura defensa visitante.
Sicasí pasaben los minutos y el Condal nun yera capaz de crear ocasiones. Sicasí, nesta segunda parte tampoco’l Ceares buscaba tanto les contres, xugando más horizontal que na primer metá.
Hasta’l final del partíu nun empezaron a llegar los plasmos, anque agora sí los carecieron dambes aficiones. Primero yera’l Condal quien disparaba dende la frontera de la área de Pablo, y el balón refugaba na base del poste visitante.
El retruque poníalu Borja Argüelles por dos vegades. Primero, nun rápidu contraataque, el balón acaba cayéndo-y al xugador xixonés, pero’l so remate estrellábase nel llargueru.
La última ocasión bricker tamién la llanzó Borja. Roba’l balón en defensa, llanza’l balón pa Pichón que ye placau na frontera cuando se quedaba solu ante Lastra.
Con balones bombiaos intentolo el Condal, con más corazón que cabeza. Solo Marcos Iglesias, conectó un remate na última xugada, pero Pablo blocó con seguridá.
Y cumplióse la fiesta.
Los de Nacho Cabo cierren una espectacular selmana, con victories sobre Llealtá y Condal. De nuevu pasen la nueche del sábadu como líderes, amás de dexar descolgaos a un Condal que tien per delantre nada menos que Ganzábal. El Ceares pela so parte recibe al Candás, un equipu que se ta xugando la vida. El Ceares caltien la fe. Y de qué manera.