[Ciares 1-1 Roces] Ciares y Roces tiren mediu derbi
Derbi desaboríu’l disputáu en La Cruz, sobre too nos primeros cuarenta y cinco minutos. Valiosu empate pal Roces.
Eraña llegaba colo xustu. L’once podía dase casi de carrerilla antes d’arrancar, ya que xugaben los únicos disponibles. En defensa, los cuatro que quedaben, Fonso, Miguel, Dani Hevia y Chery. Nel centru’l campu, los 5 a disposición, Juan Carlos, César, Natan, Pablo Martínez y Chus Naves. En punta, un solitariu Marcos Iglesias, sin competencia esta selmana. Davo baxo palos, tamién únicu porteru de la primera plantilla.
Ciares 1 – 1 Roces
Ciares: Davo, Dani Hevia, Fonso, Miguel, Chery, Juan Carlos, César, Natan, Pablo Martínez, Chus Naves, Marcos Iglesias
Marino: Jairo, Javi, Mateo (Paramio 73′), Dani, Borja, David (Reyero 35′), Sandoval (Cueto 67′), Amine, Barquero, Javi Manín, Chema
Goles:
1-0 Marcos Iglesias 61′
1-1 Reyero 66′
Árbitru: Valdés Díaz, del Colexu d’Uviéu. Amonestó a Marcos Iglesias, Fonso, Hevia y Miguel pol Ciares. Y a Paramio, Reyero, Barquero y Borja pol Roces.
Incidencies: Terrén de xuegu en condiciones perfectes a pesar de tol agua cayío pente selmana. 350 espectadores. Los trabayadores de Gijón Fabril llucieron una pancarta buscando visibilización al so conflictu llaboral.
La primer parte resultó tan insulsa, que lo únicu destacable llegó inclusu antes de dar comienzu’l choque. La plantilla de Gijón Fabril, histórica empresa que ta pasando por un seriu conflictu, daben visibilidá al so problema cola collaboración de los xugadores de los dos equipos.
Destacáu también foi la caída d’un dron nel centru’l campu, que provocó la carcaxada xeneral y sirve como una anécdota más que sumar a les que selmanalmente asoceden en Los Pericones.
Falando futbolísticamente, ente poco y nada. Un remate de cabeza de Marcos Iglesias que marcha fuera por poco pal Ciares, y un duru disparu cola zurda de Chema pal Roces, son les úniques xugaes dignes de mención. Y sólu son dignes ante la falta d’otras más clares.
La segunda parte sí cambió la cosa. Muncho más eléctrica, con llegaes a les dos árees. Pronto avisó’l Ciares. Gran xugada na frontal del área que termina con Chus Naves solu na parte izquierda. Colócala col interior pero’l balón marcha llambiendo’l poste.
El Roces trataba de salir rápido, pero cayeron constantemente n’inocentes fueres de xuegu, que impedíen terminar la xugada. N’otra ocasión nun foi’l fuera xuegu.
Marcos tuvo la más clara, nun balón que-y cae perfectu ente Jairo. Con tol tiempudel mundu trata de definir perriba, pero’l balón se-y va altu.
Poco dempués adelantábase’l Ciares. Nun, tamién inocente, penalti, el propiu Marcos engañaba a Jairo y lu batía pel centru la portería. Poníase mui de cara l’alcuentru nuna segunda parte onde los llocales dominaben con solvencia.
Sicasí, cuando más dominaba’l Ciares, y menos peligru llevaba’l Roces, llegaba l’empate. Córner aisláu que sal rechazáu al segundu palu, onde un solitariu Reyero sólu tien que emburriala.
Quedaba munchu tiempu per delantre, pero ehí paeció desapaecer un poco’l Ciares, que dominaba’l balón pero dexó de crear peligru. Claru foi un llibre indirectu dientro l’área, pero Jairo salvaba con un paradón abaxo.
D’ehí al final, un Roces envenenáu buscó la contra, y a puntu tuvo d’atopala. Sin embargu Davo solventó los problemes.
Interesante puntu pal Roces na so llucha por refugar el descensu, pero cortu pal Ciares. Agora toca un güesu, l’Uviéu B. Queda muncha lliga, pero muncha.