[Uviéu B 1-1 Ciares] Arguyu, valor y garra

Puntu meritoriu l’acollecháu pol Ciares n’El Requexón, peleando hasta l’últimu instante a pesar de les sos innumerables baxes.

Dende’l Campu 1 del Requexón lléese perfectamente un de los principales llemes del uvieísmu, el que reza “Orgullo, valor y garra”. D’eso mesmo puede presumir esta mañana’l Ciares. Con sólo 12 xugadores disponibles del primer equipu, peleó hasta’l final l’empate y llogra sumar un puntu de gran importancia.

Y ye qu’Iñaki Eraña enfrentábase a un rompecabezas durante esta selmana. Sólo 3 defenses disponibles, polo que Juan Carlos baxaba de posición, a un puestu que yá-y resultaba familiar d’etapes anteriores. Cris Alonso abandonaba la so banda d’avezu, para sumase a la media punta.

Pero’l Ciares, pese a las baxes, nunca-y perdió la cara al partíu. Si bien, numberando les ocasiones, el Vetusta, tuvo más, pero’l Ciares túvoles, non tan clares, pero túvoles. Eso sí, la más clara foi la última, la que llegó nel 94, y significaba l’empate.

Nun tardamos muncho en llevar el primer sustu, una volea cola zurda tres d’un córner estrellábase nel poste de la portería defendía pol mejor teyeru de güei, Davo. Foi’l propiu guardameta’l que atayaba’l primer de los mano a mano de la matinal dominical, despeyando con muncha habilidá cuando’l delanteru trató de sorprender buscando’l palu cortu.

El pesu del alcuentro llevábenlu los uvieínos, sobre too por una banda derecha pela que buscaben constantemente la superioridá numbérica. Así llegó’l gol llocal, nuna apertura sobre’l llateral derechu Shaq, que se va hacia dientro y dispara dende la frontal del área per baxo y bate a Davo.

A partir d’ehí, llegó’l meyor momentu del Ciares. Gran maniobra de Cris Alonso que termina disparando anque-y sal centráu. O un intentu de definición de Marcos que marcha fuera per pocu.

Na segunda parte, paecíu. L’Uviéu B dominaba más y conservaba’l balón, anque’l Ciares llegó más al área visitante. Sobre too pela parte derecha, un inmensu Dani Hevia nun desalendó en doblar a los sos compañeros, subir, y buscar opciones de centru. Una gran xugada suya, paecía a la del primer gol del alcuentru, terminó con disparu altu.

Nuna d’eses, balón dende’l costáu derechu pa César, que se mete nel área uvieína y cae derribáu. El penalti paeció claru, pero’l soníu foi más claru tovía. La xugada saldóse con saque de puerta y incontables tarxetes marielles por protestar.

Davo caltuvo al Ciares nel alcuentru. Inconmensurable nun mano a mano, nel que’l delanteru tuvo tol tiempu del mundu pa definir, pa despeyar abaxu. Tamién el capitán uvieín Héctor puso los pelos de punta a los aficionaos llocales nun disparu que buscaba la rosca.

Con Ponte nel prau, l’equipu puede buscar muncho más la segunda xugada, y neses taba’l Ciares. El partíu dominábalu’l filial uvieín, pero’l Ciares manteníase y el marcador yera axustáu. El guardameta llocal Nacho, hermanu del ciarista Chery, a puntu tuvo del infartu cuando dexaba salir un balón pela llínia de fondu, pero apaecía Ponte nun se sabe d’ónde y llegaba pa tocala. Diba al llateral de la rede.

Col marcador ya cumplíu, balón dende la esquierda. Pablo Martínez realiza’l remate del partíu, nuna volea fantástica en semi tixera cola so pierna menos bona, Nacho sólo consigue despeyar, y apaez Ponte que nun perdona. Llocura de celebración.

Tres de la ovación final retírense los xugadores teyeros. Y en lletres grandes pueden lleer “Orgullo, valor y garra”. Nun-yos faltó.