[Tiuya 3-0 Ciares] Segundes partes enxamás fueron bones
Resultáu duru l’encaxáu n’El Candín, sobre too tres d’unos primeros cuarenta y cinco minutos magníficos de constante peligru teyeru.
El Candín nun ye un prau cualquiera. Trátase d’un terrenu reducíu, nel que casi con un reblagu pases de la llínia de la banda al interior del área. Visitar Tiuya significa sufrir, l’equipu llocal sabe xugar meyor que naide ehí. Ye mui difícil llevar puntos a casa cuando ye’l llocal l’equipu dinamiteru.
Tiuya 3 – 0 Ciares
Tiuya: Jose, Borja Álvarez (Marco 83′), Luis Enrique, Dioni (Pelayo Alfayate 75′), Trabanco, Davo, Kike, Pablo Suárez, Damián, Álvaro Pozo, Meneses
Ciares: Davo, Dani Hevia, Fonso, Miguel, Chery, Aitor, César (Pablo Martínez 64′), Juan Carlos, Natan (Chus Naves 64′), Cris, Ponte
Goles:
1-0 Pablo Suárez 47′
2-0 Álvaro Pozo 54′
3-0 Damián 73′
Árbitru: Agudo Daza .Amonestó a Luis Enrique y Pablo Suárez pol Tiuya, y a Fonso pol Ciares.
Incidencies: 300 espectadores n’El Candín de Tiuya.Terrenu de xuegu en condiciones óptimes.
Sicasí, güei fueron los llocales los que sufrieron na primer parte, na que fueron mui inferiores a un Ciares que dominó’l prau y llevó peligru constante escontra la portería d’un Jose excepcional.
Pero los que más saben de fútbol falen de goles psicolóxicos. Güei los d’Eraña sufrieron ún, encaxaron nel último intre de la primer parte, y nun fueron a llevantar cabeza. Si un gol siempre ye un mazazu, el de güei foi de los más duros posibles.
Y ye que’l Ciares empezó fuerte. Malpenes pasaren 8 minutos cuando Álvaro Ponte nun podía definir nun mano a mano ente Jose. Primer avisu pa los dinamiteros.
Un Cris Alonso fantásticu traxo de cabeza a la defensa llocal. Una gran xugada suya, pisando l’área dende la parte izquierda, terminó con un disparu duru arriba que refugaba’l llargueru.
Tamién Cris cedía’l balón a Ponte, pero de nuevu Jose refugaba’l mano a mano, anque l’ariete teyeru llegaba mui forzáu al disparu.
Agora que’l destín ye caprichosu, y cuando pasaben 2 minutos de la primer parte, na primer llegada clara (y non clara) de los llocales, llegaba’l primer gol llocal, nun pase atrás y tiruu cruzáu al que nun podía retrucar Davo.
La segunda parte foi pa los llocales. Más tovía cuando a los 7 minutos Álvaro Pozo robaba un balón a Dani Hevia que lu dexaba solu ente Davo y nun perdonaba. El Tiuya pesllaba’l partíu.
Nestos segundos 45 nun pudieron llevar peligru sobre la portería llocal los pupilos d’Eraña. Los llocales dominaben con solvencia, los ataques ciaristes nun pasaben de 3 cuartos de cancha.
Nel 73 llegaba’l terceru, nun saque d’esquina dende la banda derecha que cabeceen a gol.
Col partíu resuelto, poca historia. Pol Ciares lo más divertíu foi una salida de Davo col balón, marchando de dos xugadores con gran calidá, gran tranquilidá, y gran sustu pa los aficionaos.
Un tiempu pa cada equipu pero termina 3-0. Inexplicable, pero fútbol. Si fuere más cenciello d’entender nun sería tan apasionante.