[Ciares 1-6 Avilés] Tarde tormentosa

Dura derrota pa un Ciares que vivió un mal suañu en La Cruz frente a un Avilés qu’amosó una pegada que lu acredita como un grande de Tercera.

Los aficionaos del Ciares celebraron esti fin de selmana un San Valentín diferente. Averáronse a la Cruz a demostrar el so amor al equipu a pesar del temporal de fríu y agua qu’azota la Península Ibérica. 250 espectadores nun son pocos nuna tarde como la de güei.

El prau tresformóse nun Aquapark. Charcos, barru, pedrisca. L’Avilés, con xugadores yá mui curtíos, supo lleer meyor el partíu que’l xoven Ciares. Y eso que los llocales pudieron adelantase antes, pero nun acabaron de disparar cuando teníen too a favor.

Sicasí, al cuartu d’hora, un error d’entendimientu ente Davo y la defensa dexaben a Jorge Rodríguez cola portería vacía pa subir el primer gol al marcador.
Diba l’Avilés per delantre mel marcador. Pero’l prau taba tan castigáu que pocu fútbol se veía nos Pericones. Poques ocasiones nesta primer parte. Por parte del Ciares, una falta que llanzaba Dani Hevia buscando la escuadra, y un paradón de Davo a la réplica avilesina nun disparu dende la frontal del área. Nel rechace llevantaba’l linier el banderín.

Y nel últimu instante d’esta primer parte, el partíu quedaba vistu pa sentencia. L’ex del Ciares Óscar Ruiz, que dexaba l’Uviéu B nel mes d’avientu pa recalar n’Avilés, recoyía un rechace y batía a Davo perriba.

El propiu Davo tenía que queda na caseta al descansu. Una hipotermia obligábalu a dexar el puesti a Álvaro, porteru del equipu xuvenil, que debutaba en Tercera División. Anque nun paecía’l meyor día pa facelo.

Sin embargu, el nuevu cancerberu llocal tuvo al altor de les circunstancies. Amosábase tranquilu nes salíes, y solvente colos pies. Tuvieron que pasar 20 minutos pa que pasara algo n’ataque, cuando cometía penalti nuna salida a los pies. El llanzamientu, a lo Panenka, yera refugáu pol llargueru.

Sin embargu, poco dempués, llegaba’l terceru. Jorge Rodríguez, autor del primer gol y del error nel penalti, remataba de primeres un gran centru servíu dende la banda derecha. Y instantes seguíos, el cuartu, nuna xugada rapída.

Hugo, xugador tamién del xuvenil, daba una alegría a l’afición al marcar, tres d’un gran control y definición. Controlaba col pechu, internábase nel área a pesar del agarrón, y cruciaba’l balón al otru palu.

Sicasí, quedaba tiempu pa más goles. Nos últimos instantes del alcuentru, Matías y Pantiga marcaben el quintu y el sextu pa cerrar el castigu. Castigu duru. La tormenta nun amaina en Ciares.