Faciendo hestoria nel club
Nueva xornada nel fútbol base ciarista, claramente marcada nesta ocasión pol debú de dos nuevos equipos que son la punta de llanza pal desenvolvimientu de la nuesa cantera nes categoríes de campu.
Per un sitiu, l’equipu alevín fixo’l so debú con un dignu papel ante l’equipu más difícil de la so categoría, un Veriña C.F. qu’herieda munchu xugadores del campeón d’Asturies benxamín de la temporada 12/13.
De siguío yera la vez del xuvenil, equipu especialmente significativu por devolver al club, esta vegada con garantía de continuidá, una categoría na que tuvo presencia en diversos momentos de la so hestoria y que s’antoxa fundamental pal funcionamientu d’una cantera que garantice’l futuru del primer equipu.
Los mozos ciaristas realizaron un partíu bien sólidu, nel qu’apoderaron con claridá y ganaron al C.D. San Lorenzo por 3 – 1, abriendo esta nueva etapa per tolo alto.
Nes yá más establecíes yá categoríes de pista, volvimos vivir una nueva xornada del fútbol más puro y esfrutamos colos nuesos chavales.
Prebenxamines
Oriamendi 6 – 5 U.C. Ceares
Derrota difícil de dixerir pa nuetros peques yá que nos últimos minutos ganaben por 1-4, pero nun pudieron aguantase al emburrie local nos intres finales y acabaron venciendo, non ensin por ello realizar un meritoriu partíu.
U.C. Ceares B 0 – 14 E.F. Mareo
Nunca ye fácil pa los más pequenos afaese a la nueva categoría, y eso tase faciendo notar, especialmente ante equipo más esperimentaos. Sicasí’l marxe de meyora ye bien grande y eso anímanos a siguir trabayando.
Benxamines
U.C. Ceares 7 – 2 Inmaculada D
Segunda victoria nesti entamu de lliga nun partíu que se quedó curtiu nel marcador por cuenta de munches imprecisiones per parte de los locales. L’equipu ta amosándose bien fuerte nesti arranque ligueru.
E.F. de Mareo 6 – 6 U.C. Ceares B
Empate inxustu en Mareo con delles decisiones incomprensibles per parte del árbitru nos últimos minutos del partíu. Por xuegu y actitú merecieron más los nuesos chavales.
U.C. Ceares C 5 – 2 Asunción C
Tamién repite victoria’l redrueyu C nesta segunda xornada, nun partíu que tuvo lo más interesante na primer parte y decayó tres el descansu.
En vista de soceder esta fin de selmana, nun podemos esperar pa volver emocioanos coles nueses categoríes de fútbol base.
¡PUXA CIARES!